jamie oliver recipes · السلطات · اطباق رئيسية · اطباق رئيسية -اسماك وماكولات بحريه

سمك سلطان ابراهيم مع سلطه الطماط الملونه بطريقة جيمي اوليفر

تعودت اكتب وره كل وصفه قصه … وساعات القصه تقلب مسلسل من 100 حلقه هههه…الحلقه الثانية من صوغتي سويت فيها هالوصفه

طبعا من بلاغه الشف كنت اتصفح الكتاب وانا بالدوام وقررت اسوي هالوصفه بالذات لان حسب جدول نظامي الغذائي اللي المفروض امشي عليه

مثل ما تشوفون كميه الطحين اللي حطيتها بسيطه جدا جدا اقل من قفشه صغيره… احب اهني روحي على مهاراتي اللي تحسنت نوعا ما  بتخليه الشوك من السمج او بمعنى اسهل اطلع فيليه من السمج  هههه

نرد حق الوصفه… بالوصفه الاصليه فتفت السمج مع السلطه وانا حبيت اقدمها بروحها مع سبانخ وضفت للسلطه فلفل احمر صغار

شوفو الاصل والتطبيق

قبل لا ابتدي بالوصفه بقول ملحوظه … اذا ما كان عندكم متوفر اوراق الشمر بدلوها شبنت وهم اذا السمجه مو متوفره عندكم بدلوها باي نوع فيليه  و تشكيله هالطماط تيي بعلبه وحده تحصلونها بلولوماركت 🙂  وملاحظتي الاخيره اللي دار مدار الصحن مو نثار دياي هذا البقسماط اللي المفروض اقدمه مع السمج  مسويه فيه ديكوريشن هههه

بسم الله نبتدي

المقادير كلها حسب الرغبه

فيليهات سمج ابراهيم او اي نوع ثاني

طماط تشيري ملون

اوراق ريحان

اوراق شمر

ملح

فلفل اسود

فلفل احمر مجفف او اي خليط فلفل تحبونه

نص حبه فلفل احمر مقطعه شرايح صغيره رفيعه

سبانخ

طحين

زيت زيتون

خل اي نوع سواء العادي او بلساميك او اﻻحمر او التفاح

قشر ليمون

زعتر اخضر او مجفف ..ما اقصد اللي مع سمسم

الطريقة:

اول شي نخلط مكونات السلطه وهي الطماط والفلفل ونضيف له الملح والفلفل الاسود والخل والزيت ونخلطه عدل وتالي نضيف له الشمر والريحان

نبهر السمج بالملح والفلفل الاسود والفلفل الاحمر والاعشاب اذا حبيتو ونرشها رش خفيف بالطحين ونحطها بالزيت على النار جهه اليلد ((لاني مسويه رجيم حطيت فيها اقل من قفشه كبيره زيت ولغيت الزيت اللي بالسلطه )) ما تاخذ وقت دقايق ونقلبها على الويه الثاني لين تحمر

بنفس المقله نحمص البقسماط مع قشر الليمون والزعتر والفلفل الحار ونقدمه مع السمج

السبانخ سلقتها على البخار مع ملح وفلفل اسود وعصرت الماي الزايد بيدي

جربوها مرح تندمون باذن الله

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s