باستيسيو .. باستا يونانيه

معكرونه بالبشاميل بطريقه يونانيه رح تحسون انها ادسم ونكهه الدارسين فيها ظاهره ..نوع الجبن المستخدم كسيري ولما دورت لقيت اقرب شي له القشقوان  وتقدرون تستخدمون باميزان مثل الوصفه الاصليه.. اذا مليتو من طبق البشاميل العادي عندهم هالوصفه تطبقونها

اخذتها من اينا غارتن الوصفه الاصليه تلقونها هني

بسم الله نبتدي

المقادير

3 م ك زيت زيتون

كوب ونص بصل مفروم

نص كيلو لحم غنم مفروم

نص كيلو لحم بقر مفروم

قفشه صغيره ثوم مهروس

نص قفشه كبيره دارسين ..واهي كاتبه قفشه كامله بس حسيتها وايد

م ص اوربغانو مجفف

م ص زعتر اخضر

م ص فلفل اسود ناعم

2 م ص ملح

علبه طماط مهروس مع عصيره

البشاميل

كوب ونص حليب كامل الدسم

كوب كريمه

نص اصبع زبده

ربع كوب طحين

ربع م ص جوز الطيب مطحون

2 بيض كبار

كوب ونص جبن بارميزان او جبن يوناني كسيري او قشقوان

كوب روب يوناني او لبنه

م ص ملح

م ص فلفل اسود

وطبعا علبه باستا مسلوقه

الطريقة

نحمس البصل بالزيت ونضيف له الثوم لين قلب لونهم وبعدين نحط عليهم نوعين اللحم والبهارات والاعشاب ونحركهم  لين ينشف اللحم  نضيف علبه الطماط ونترك الكل يستوي مع بعض

نسخن الحليب مع الكريمه

نحمس الطحين بالزبده لين تشقر وتالي نضيف لهم الحليب بالتدريج مع التحريك حتى يتجانسون كلهم تالي نضيف نص كميه الجبن مع البهارات  واذا ثقلت نشيلها من النار واذا فترت نضيف البيض واللبنه

نخلط الباستا مع صلصه اللحم ونحطها بالبايركس ونصب البشاميل فوقها واخر شي نضيف باجي الجين وندخلها الفرن لين تحمر واكلوها بالف عافيه

الإعلان