ماسالا زهره (قرنبيط ) هنديه

هالوصفه اللذيذه اخدتها من هالبلوق

http://www.journeykitchen.com/2011/04/gobi-butter-masala-cauliflower-butter.html

المفروض انها يخنه  او ماسالا بس بحالتي صارت حمسه … سويتها بقرار قديم اني اصير نباتيه لاسبوع قررت اجرب وصفات يديده :>

الفرق بين الوصفه الاصليه وتطبيقي اني دبلت كميه الزهره وقللت شوي من البهارات وبدلت الزبده بالزيت ولغيت الكريمه … اتوقع مع الكريمه بتكون اغنى بس هم من غيرها كانت حلوة

جربوها وان شاء الله تعجبكم :>… من اول ما تسوونها ريحه المطبخ كلها بتصير جنها مطعم هندي وهالنوعيه من الاكل محبوب بالشتا… اتوقع تصلح بعد كحمسه للريوق

لطباعة الوصفه يرجى الضغط هنا

المقادير:
حبه زهره متوسطه
قفشه كبيره بهار غرام ماسالا ( اخذتها من دين اند دالوكا )
فلفل اخضر حار مفروم ناعم
قفشه كبيره خليط من الزنجبيل والثوم المفرومين
نص كوب ماي
قفشه زيت
ملح حسب الرغبه
مقادير الماسالا :

قفشه كبيره زيت
بصله مفرومه
3 طماطات مفرومين
قفشتين كبار معجون طماط

قفشتين صغار خليط الزنجبيل والثوم
بهارات عدله ( هيل حبش حبه صغيره +ورقه غار  + حبه هيل + 2 مسمار + نص دارسين + نص قفشه صغيره كمون  )

قفشه صغيره بهارات غرام ماسالا

قفشه صغيره فلفل احمر وممكن تلغونها

قفشه كبيره كاجو مطحون مخلوط مع لوز مطحون

قفشه كبيره كزبره بودر مطحون

نص قفشه صغيره كركم

رشه حلبه مطحونه

ورقه غار

حبه هيل

نص كوب ماي

الطريقه:

في البدايه نخلط الزهره مع الغرام ماسلا والفلفل والثوم والزنجبيل .. نسخن الزيت ونحط الزهره ونحمسها اول ما يقلب لونها بني نضيف الماي ونخليها تستيو

والحين نسوي الماسالا.. نسخن الزيت ونضيف له البهارات الكامله نحمسهم شوي ليمن تطلع ريحتهم وتالي نضيف البصل

 ونحمسه لين يتغير لونه وبعدين نضيف الزنجبيل والثوم وباجي البهارات الناعمه والطماط والمعجون  والماي ونتركه على النار لين تتكون صلصله ثقيله نطحنها بالخلاط ونضيف الزهره عليها ونتركها شوي وعليكم بالف عافيه

بالوصفه الاصليه ضافت مقدار من الكريما بعد ما ضافت الزهره وانا استغنيت عنها بس هم طلعت لذيذه

Advertisements

2 Comments اضافة لك

  1. منال كتب:

    يعطيك العافيه ويكثر خيرك ..
    جربتها اليوم على العشا مع ضفاير الفلفل الاحمر بس انا سويتها لا صمونات صغار .. و مع الخبزه الاسكتنلديه(مدري …الاسم صح او لا ) بس الي بدون تخمير .. عشا جميل جدا و كان صدق عشا يناسب الشتا وياهم بعد شوربه مشروم
    دايم وصفاتك تعجبني وماتخذلني .. ماعرفت هيل الحبش
    صراحه وحطيت بداله الهيل العادي ,,
    اطباقك توب ومدونتك هي المكان الي احب ازوره و اتابعه كل يوم .. بحاول ارسلك الصور بعد 🙂
    يعطيك العافيه بنت الديره .. واحلى ديره الكويت

    1. bent el deera كتب:

      حبيبتي عليكم بالف عافيه
      ومشكوووووووووووره وايد وايد على هالحجي اللي يبرد القلب
      جدا سعيده بتعليقج 🙂

      هيل حبش ماعرف له اسم ثاني بس هذي صورته

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s