بسبوسه بالقشطه

وصفه هالبسبوسه قديييييمه جدا … اخذتها من النت من منتدى حوا من العضوه دموع يائسه …  اخوي الغالي طلب مني اسوي له حلو للديوانيه ويت على بالي هالبسبوسه لان مكوناتها سهله ولان ما فيها جوز هند او( ناريل ) لان اخوي ما يحبها… وبعدها قام يطلبها بشكل متكرر … اعتقد نسبه كبيره منكم مجربتها وعارفين طعمها  :)… للي مو مجربها اقولكم جربوها وان شاء الله بتحبونها 🙂 .. الفرق بين هالوصفه والوصفه الاصليه اني اخلط فستق مطحون وشوي ماي زهر مع القيمر عشان تكون اخن واحلى .. وممكن تضيفون جبن موتزريلا  او كيري او ككاو بودر او الوان او حتى شعر بنات مع القيمر لتغيير النكهه واضافه شي يديد … اذا تحبون نكهه جوز الهند بالبسبوسه ضيفو للمقادير نص كوب جوزهند ( غير محلى )

عندكم وصفه ثانيه حق البسبوسه بالقشطه بتحصلونها هني

هالصوره قبل لا اضيف لها الشيره لان شيرتي كانت ساخنه ونفس الشي البسبوسه … القانون يقول اما الشيره بارده والحلو ساخن او العكس صحيح

تحتاجون حق

كوب سميد ناعم او خشن كيفكم
3/4 كوب حليب بودرة
3/4 كوب زيت
1/2 كوب سكر
قفشه صغيرة فانيلا
1 قفشة كبيرة بيكنغ بودر
2 علبة قشطة نستلة او بوك اللي تيي معلبه

الحشو :

2 علبة قيمر كي دي دي صغار للحشو او علبه كبيره

قفشتين او ثلاث كبار فستق مطحون

رشه ماي زهر

لوز انصاف للزينة

وهرده او طحينه  لمسح الصينية

وعند التقديم : شيرة ( قطر )

كل كوب ماي عليه كوبين شكر وعصره ليمون وحبتين هيل نخليه على النار لين يثقل وممكن تضيفون له مطيبات مثل ما تحبون مثل الزعفران او الفانيلا او ماي الزهر

الطريقه :

اول شي نسخن الفرن على درجه حراره 160-180   ونمسح صينيه الفرن بالهرده عشان لا تلزق البسبوسه

نخلط مقادير الحشوه مع بعض ونخليها

  نخلط كل المقادير مع بعض( من غير مقادير الحشوه طبعا ) .. نصب نص كميه الخلطه بالصينيه وبعدين ننوزع عليها الحشوه ونصب باجي الخلطه فوقها  مع ترك مسافه بالحواف عشان لا تطلع القشطه لي فوق… نخلي حركتنا سريعه لان الخلطه بسرعه بتنشف  ( اذا  واجهتو مشكله بالفرد او ثقلت معاكم ممكن انكم تضيفون شوي ماي  او حليب وتردون تحركونها بترد تميع ان شاء الله )

نزينها بانصاف اللوز وندخلها الفرن .. اذا تحمرت من الاجناب نخلي النار من فوق عشان تتحمر عدل

اذا طلعت من الفرن نسقيها شيره وتاكلونها  بارده او ساخنه وبالف عافيه

الإعلان