محاشي مشكله بالزيت او الدولمه بالزيت او يالنجي

الحلو في المحاشي المشكله ان النكهه اطيب .. ممكن تحشون اي شي متوفر عندكم ( لهانه ، شلغم ، سلق ، ورق عنب ، قرع ، طماط ، بصل ،خيار ، بادنجان ، فلفل ، كوسا ، طماط  ، بطاط  )

هالوصفه اخف لان الحشوه ما فيها لحم وناشفه من غير صلصه  .. اكلو معاها سلطه خيار بالروب وبالف عافيه

الحشوه اللي استخدمتها نفس اللي اخليها حق ورق العنب بالزيت عاده وهذي وصفات عده لها

طبعا تقدرون تحطون بالحشوه اي شي ترغبون فيه وممكن تحمسون البصل والرز بالزيت مع البهارات واذا برد تضيفون له باجي الحشوه

وصفه  المحشي التقليديه تحصلونها هني … والخطوات التفصيليه تحصلونها هني

المقادير :

للحشوة :

جيله (مقدار علبه اناناس ) عيش صنوايت او اي ماركه المهم تكون حبته صغيره

3 طماطات مفرومه ناعم

كوبين بصل مفروم ناعم

كوب بصل اخضر مفرم ناعم

3 شدات بقدونس مفروم

شده نعناع مفروم

شده صغيره شبنت حسب الرغبه وممكن تستغنون عنها

نص كوب عصير ليمون

4 قفاش او مﻻعق كبيره دبس رمان

نص كوب زيت زيتون

قفشتين كبار ملح او حسب الرغبه

قفشه صغيره دارسين ناعم

قفشه كبيره بهار

نص قفشه صغيره فلفل اسود

مكعب ماجي

قفشتين كبار ثوم مقصص صغار

الخضار :

مثل فلفل اخضر وكوسا وورق عنب وملفوف وبصل ابيض كبار  وطماط يكون جامد شوي

للطبخ :

  • عندكم خيارين اما تطبخونه بماي سلق دياي او لحم او ماي مذوب بماجي+ قفشتين معجون طماط

  • او اذا تحبونه حامض نحتاج نص كوب زيت زيتون + نص كوب عصير ليمون + شوي ملح +  وقفشتين كبار معجون طماط + ماي كافي للتغطيه

الطريقه :

البدايه نجهز الحشو عن طريق خلط كل المكونات مع بعض ونخليها فتره تتشرب من البهارات وبهالاثناء نجهز الخضار

للملفوف : بالسكين نقور القاعده السفليه اللي تمسكها ونسلقها كلها بجدر فيه ماي يغلي مع شويه كمون وملح ونتركها لين تصير شفافه تقريبا ونشيل طبقه طبقه وبعدين نقصها حسب الحجم المطلوب

البصل  :نقص جهه وحده من البصل الى كامل الجوف من غير ما نقطعها ونسلقها شوي عشان تطرا ونشخلها ( ما تاخذ وقت )

الطماط : نقطع الراس ونفرغ بطنها من البذور والعصاره بس نخليها سميكه شوي

الفليفله : نقطع راسها ونظفها من البذور اللي ببطنها

ورق العنب : نغسلها بماي مغلي عشان نتخلص من المواد الحافظه واذا كان الموجود عندنا طازج نسلقها شوي بماي مغلي مضاف له شوي ملح عشان تطره

بقاع الجدر نحط عروق الملفوف والطماط اللي فرغناه وممكن تضيفون بطاط اذا تحبون

نحشي كل الخضراوات بالحشوه ونصفها بجدر الطبخ مع ملاحظه ان ما نخلي فيها فراغات .. نحط بويها صحن وثقل ونصب فوقه الماي المتبقى من الحشوه والسائل اللي تبونه … نتركها على نار متوسطه بالبدايه وبعدين نخفف عليها النار لين تستوي وتشرب كل الماي الموجود … اذا حسيتو ان الماي نشف والخضار محتاجه ماي صبو عليها باطراف الجدر وتركوها على النار زياده … وقدموها وبالف عافيه

3 thoughts on “محاشي مشكله بالزيت او الدولمه بالزيت او يالنجي

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s