apple pie او فطيره تفاح

من الوصفات المحببه الى قلبي … أمي الله يرحمها  افضل شخص يسويها بنظري وللاسف ماعندي وصفتها الخاصه… هذي احدى محاولاتي للتطبيق .. انصحكم تجربونها

اذا ما لكم خلق تسوون العجينه تقدرون تاخذونها مثلجه من الفريزرات تحت اسم” shortcrust pastry”

مقادير العجينه :

2 1/2 اكواب طحين ابيض بارد

رشه ملح

6 -8 م ك ماي بارد جدا ( الافضل اضافه ثلج له للتاكد من مستوى البروده )

1  كوب زبده مثلجه مقطعه مربعات صغيره

1 م ص سكر

مقادير حشوه التفاح :

7 حبات تفاح ( اخضر واحمر مخلوطين لنكهه اغني )

كوب سكر ابيض او اسمر ( انا استخدم خليط من الاثنين )

2 م ك زبده

م ك دارسين ناعم

رشه جوزه الطيب

رشه ملح

قفشه كبيره عصير ليمون + نص بشر ليمون

3/4 كوب طحين ابيض

ربع كوب جوز مفروم خشن

بالخلاط الكهربائي .. نضيف  الطحين والملح  والزبده ونخلطها لما تصير مثل البقسماط بس اذا مسكناها تكون متماسكه مع بعض وتالي نضيف الماي  بالتدريج …نشيلها ونغلفها بالبلاستيك ونحطها بالثلاجه ترتاح نص ساعه

بهالاثناء نجهز التفاح… نقشره ونقصصه جوانح نضيف له الليمون ونص كميه الشكر ونذوق التفاح ونزيد الباجي حسب الرغبه … نضيف له البهارات والملح ونزيد الطحين عشان يشرب السوائل اللي تنزل من التفاح مع الشكر

نطلع العجينه من الثلاجه … ونخليها جزئين  .. نص نمدها على صحن البايركس او الفرن وبعدين نمسح القاع ببياض بيض عشان يكون طبقه عازله  عن التفاح … تالي نضيف التفاح ونخلي الزبده على الويه وتالي نمد الوه الثاني عليها ونخلي فيها فتحه عشان تطلع البخار وما تنبط

نمسح الويه ببياض البيض والشكر الاسمر … بباجي العجين المتبقي نسوي اشكال ونلزقهم على الويه كنوع من الديكور

ندخلها بفرن حرارته 180  لمده 40-50 دقيقه … اذا تحمرت الاطراف بسرعه نغطيها بورق قصدير ونرد ندخلها الفرن تكمل سواها

تبرد شوي وتنوكل مع ايسكريم فانيلا وبالعافيه

الإعلان