مع اقتراب رمضان الله يبلغنا اياه بصحه وعافيه ويتقبل طاعتنا فيه  موضوع التجهيزات والاطباق اليديده اهم موضوع حيوي الكل يتناقش فيه .. بالاضافه طبعا الى المواضيع الاخرى

هالوصفه مويديده … تقريبا عرفتها بسنه 2010 لمنال العالم وتطبيقها حلو وحشوتها احلى… شوفو شحلاتها

بالنسبه لي كنت دايما اسويها بنفس اليوم  لانها سريعه وكميتها بسيطه فما جربت اثلجها … بس تنفع للتجهيز المسبق والتثليج بس دبلو المقدار

جربوها وغيرو الحشوه مثل ما تبون اذا ما تفضلون اللحم .. ممكن حمسه بطاط وبزاليا … او بطاطا حره ,,, او خضار … او انواع جبن مشكله او اي شي تحبونه

وممكن تكبرونها تغيرون بالتشكيل والحجم تخلونها جيوب كبيره وتصير طبق رئيسي بدال المقبلات او تخلونها ميني للتقديم مع الشاي

الوصفه الاصليه تلقونها هني … بتلاحظون زدتها  حبه بركه و كركم للون وتقدرون تستغنون عنها اذا ما تحبونها

المقادير:

2 ك طحين+ 1/2 ك احتياط

1/4 م ص ملح

1/4 م ص كمون

1/8 م ص كركم

1/2 م ص حبه بركه

3/4 ك حليب سائل

1/4 ك زيت نباتي

الحشوه :

م ك زيت ذرة

ربع كيلو لحم مفروم

حبه صغيره بصل

 م ص ملح

1/4 م ص فلفل

 1/2 م ص كاري

حبه جزر مبروش

1/2 حبه من كل من فلفل اخضر واحمر واصفر مكعبات صغيره

1/2 ك كزبره مفرومه خشن

وحبه فلفل حار او علوب مفروم حسب الرغبه

الطريقه :

نسخن الحليب مع الزيت على النار لين يغلي المزيج ونصبه فوق خليط الطحين والبهارات وحبه البركه ونعجنها لين تعطينا عجينه طريه ( اذا ما عندكم عجانه خلطوهم بقفشه خشب ) ونتركها ترتاح بعد ما نغطيها بنايلون على ما نحضر الحشوة

الحشوه سهله .. نحمس اللحم لين يقلب لونه وينشف وتالي نضيف عليه البصل والبهارات ونتركهم لين يذبل البصل ويستوي اللحم نسكر النار و نضيفه على باجي مكونات الحشوه

نقسم العجينه على حسب الرغبه ونفردها ونشكلها حسب الرغبه

العجينه تهبل بسرعه تلزق ببعض ومرح تتعبون بتشكيلها… اقلوها وقدموها بالف عافيه

About these ads