الالبه او بر الوالدين او بمعنى آخر كريم كراميل كويتي

وصفه شعبيه قديمه بدت ترد بقوه هالايام … والصراحه ما ينلامون هذا وقتها بااااارده ومنعشه وتطفي الحراره وبنفس الوقت لذيذه وخفيفه … طريقتي فيها تقليديه جدا جذي تعلمتها من امي الله يرحمها .. في ناس يحرقون شكر قبل لا يضيفون خليط الحليب وفي ناس يحطون حبه بركه بالويه وفي ناس يفضلون الشكر بدال الحليب المحلى وفي ناس تحط قيمر او كريمه  بالخلطه او تنكهها بالفانيلا وهالاضافات كلها حسب الرغبه وحسب الذوق..بالنسبه لي احبها كثيفه بس بنفس الوقت تذوب بحلجي اول ما اكلها … احبها حاليه واحب نكهه الهيل والزعفران تبين فيها لدرجه لما ابطلها تهف علي ريحه الهيل .. وعشان نوصل لي هالمرحله افضل الهيل يكون مطحون فرش بالبيت لان ريحتها بتكون اقوى وطعمه بيفرق بالالبه

يفضل انها تبرد جم ساعه ويفضل تبات ليله قبل الاكل كل ما بردت كل ما كانت احلى.. الوصفه الثانيه تلقونها هني

الحين نيي للمقادير:

6 بيضات

كوبين حليب بودر .. اذا كان النوع المتوفر عندكم قليل او خالي الدسم بهالحاله نزيد على المقادير علبه قشطه او قيمر

5 اكواب ماي

علبه حليب محلى كبيره ( بمقدار كوب ) اذا تحبون حلاها اخف تقدرون تقللون واذا مو متوفر استخدمو بداله بنفس الكميه الشكر او ما يعادله ستيفيا اذا كنتو تراقبون وزنكم

هيل وزعفران حسب الرغبه

مقادير الالبه

الطريقه :

نخلط كل المكونات مع بعض وما نبالغ بالخلط.. نحطه بطاسه معدن او بايركس او اي نوع مقاوم للحراره ونرش على الويه مره ثانيه زعفران عشان اللون والنكهه ونغطيه وهالخطوه مهمه عشان لا يحترق الويه من الحراره

نحطه بحمام مائي بمعني نحطه بطاسه اكبر فيها ماي ساخن وندخله بفرن 200-210 لمده ساعه ونص او حسب حجم الماعون …  او ممكن تدخلونه الفرن على طول من غير حمام مائي على حراره 160 وزيدوها ربع ساعه (( الافضل شيكو عليها بعد مرور ساعه ونص واذا احتاجت وقت زياده زيدوها )) … تركوها تبرد فتره كافيه بالثلاجه وتمتعو فيها بارده وعليكم الف الف عافيه

ملاحظه :

* انا ذكرت طريقتين للطبخ وافضل فيهم الحمام المائي لانها ما تحتاج مراقبه

* لمعرفه النضج نعاملها مثل ما نعامل الكيك ندخل عود خشب بالنص واذا طلع ناشف يعني استوت

* اول ما تطلعونها من الفرن بتشوفونها منفوشه نفس الصوره وهالشي عادي بعدين بترد تفش

Advertisements

7 Comments اضافة لك

  1. kollshi17 كتب:

    بارك الله فيكم على التدوينة المميزة
    و جزاكم الله كل خيرا

    1. bent el deera كتب:

      شكرا جزيلا كلامكم اسعدني 🙂

  2. Sumayya كتب:

    Do u publish your recipes in English?

    1. bent el deera كتب:

      i do upon request..just tell me which recipes do you want and i’ll try to translate it with my poor english 😛

  3. Sumayya كتب:

    Well I’d liv to try all your dishes
    But maybe this one to start off with
    Thanks

    1. bent el deera كتب:

      done
      you can check it now 🙂

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s