محروق صبعه بطريقه القصار من برنامج نكهه وبهار

ما شاء الله عليه سليمان القصار .. الاكلات اللي يطبخها ببرنامجه ملح وبهار تشمون ريحتها من ورا الشاشه  وتشوقكم غصب على الاكل اللي يسويه لدرجه خلاني اشتهي الكراعين  بحلقه فاطه الطباخ وانا اصلا ماحب الكراعين خير شر … بحلقه امس زاغ قلبي على المحروق صبعه اللي سواه تبارك الله ..  وقررت اسويها وره البرنامج على طول ولان الناس صيام وموعد برنامجه قبل الفطور فما يمدي اسويها بدياي مثل ما سواها فسويتها بالخضار المتوفره عندي .. والنتيجه لذيييييذه جدا تسلم ايده على هالوصفه

ذكر اشياء مهمه للحصول على مرقه شهيه  منها ان المعجون ما ينحط مع  حمسه الطماط عشان لا يحترق ويطلع طعم مو مستحب ولازم الادام يطبخ مع البهارات او يتعرق مثل ما يقول قبل  اضافه السائل عشان النكهه واخيرا وليس اخرا اضافه نتفه شكر مع الطماط عشان يعطيه النكهه

لا تطوفكم كل وصفاته موجوده على هاللينك

المقادير : تكفي شخصين

بصله كبيره مقطعه مكعبات متوسطه

حبه قرع مقطعه كبار

حبه فلفل اخضر شرايح

حبيتين بطاط مقطعين كبار

جزرتين كبار مقطعين كبار

وطبعا اذا عندكم كوسا وبيديان ضيفوهم

نص راس ثوم

نص علبه معجون طماط

طماطتين كبار مفرومين ناعم

البهارات  :لومي  كاري وفلفل اسود وهيل ودارسين وبهار مخلوط وكركم

قفشه شكر

علب فلفل اخضر

مرقه سلق دياي او ماي مذوب فيه مكعب ماجي

جيس خبز خفيف مقطع ( استخدمت اسمر مثل اللي استخدمه  بالبرنامج )

الطريقه :

نحمس البصل بزيت نباتي ونضيف له البهارات  تقريبا  قفشه صغيره مالت الاستكانه القديمه ماعدا الهيل والدارسين رشه تالي نضيف الثوم والطماط  ونحركهم لين يذبل ونضيف الخضار  والملح حسب الرغبه والمعجون  والشكر ونقلبه شوي وبعدين  المرق ونتركه  يغلي ونضيف اللومي ونوطي النار لين تستوي الخضار

نضيف له الخبز المقطع وبين فتره وفتره نقلبه لين يشرب الماي و نقدمه وبالف عافيه

3 thoughts on “محروق صبعه بطريقه القصار من برنامج نكهه وبهار

  1. يقول kollshi17:

    بارك الله فيكم
    و جزاكم الله كل خيرا
    تدوينة مميزة
    مدونة اكثر من رائعة

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s