وصفات رمضانيه · اطباق شعبيه · حلويات

مبصل دبس

اصل المبصل  حساوي و من اللي تعلمته من خالتي الكبيره الله يطول بعمرها انه عباره عن عجينه لقيمات يزيدونها بيض وبصل ويقلونها ويرشونعا بالدبس ومن هني يت تسميتها ….وهالوصفه  لها معزه بقلبي و احبها وما اكلها الا برمضان  لانها ثقيله ويمكن لان تعودنا ناكلها بس برمضان .. ريحتها اول ما تتغطس بدبس تردني بالوقت مع يدتي الله يرحمها  لمن تعطيني اياها فرش حاره وهي مقرمشه من بره وطريه من داخل  وتنقط منها قطرات الدبس .. طبعا ماقدر اوصل مواصيلها بالمبصل بس الوصفه اللي بذكرها بتعطيكم مبصل ناجح ان شاء الله وعندكم خيارين اما تحطون بصل عادي او تكرملون البصل وتنطرونه يبرد قبل ما تضيفونه للخليط… يمكن مو الكل يتشجع يسويه لان فيه بصل ودبس بس صدقوني زفره البصل مرح تطلع كلش وهو مع الدبس بيعطون نكهه متجانسه .. تخيلو نفس صلصه الباربيكيو مع البصل مع البرغر .. اذا تبونها اخف حطوها بشيره بس برايي بدبس  احلى

عموما للي متخوف ومو حاب يجربها كحﻻ او سويت ممكن يستخدم نفس هالمكونات لعمل المبصل المالح من غير دبس ( يشابه خبز العروق او كباب بحريني او بﻻبﻻ وغيرها من التسميات ) و ممكن  يزيدها جزر مبشور وبقدونس وطماط وبقل  واي خضره تحبونها وبهار ويقليها عادي نفس خبز العروق بس بتكون منفوشه اكثر

اللي يبي يسويها وعنده عجينه لقيمات معتمده يستخدمها مو الا يلتزم بمقداري و ممكن تضيفون حبه بركه لو تحبون

المقدار المذكور بيعطيكم كميه راهيه قللوه حسب الرغبه :

1 كوب طحين اسمر

نص كوب طحين ابيض فاخر

1/2 م ك خميره فوريه

1.5 م ك حليب بودر

نص م ص  بيكنغ بودر

واذا تبونها تقرمش بزياده ممكن تضيفون م ك نشا ( بحالتي ما اضيفها )

نص م ص سكر .. اذا بتسوونه مالح قللو الكميه

رشه ملح

ربع م ص كركم للون

1نص ك بصل مفروم ناعم

بيضه

كوب ماي دافي

دبس حسب الرغبه

الطريقه :

نخلط نوعين الطحين مع الخميره والملح والشكر والحليب والبيكنغ بودر والماي  ( لازم تطلع بسمك عجينه اللقيمات ) ونخليها تخمر تقريبا ساعه الا ربع او ساعه حسب درجه حراره المطبخ

نفرك البصل بالكركم او رشه فلفل ونضيفه للخليط ونضيف له البيضه ونخلطه

نقليه بمقله واسعه بزيت قليل ( نفس صب القفشه ) رح تنتفخ بسرعه  ونقلبها لما تتحمر .. نسقطها بالدبس ونقلبها بسرعه ونشيله عشان لا يشرب وايد ويقدم بالف عافيه

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s