سمك صبور مشوي

صبور

من انواع السمج اللي احبها جدا  واكره  اني اوديها الخباز ويردها سوده جنها لابسه عبايه فاسويها بفرن البيت احسن .. ولاني احب طعمها فاخفف الحشو  والبهعار عشان لا يطغي علي نكهتها المميزه

 وهي من الاسماك اللي لها طقوس  خاصه  عشان تكون رحلتكم  معاها ممتعه  .. اول ما تقعدون بالسفره شمرو عن جمومكم الى اقصى حد تقدرون ويفضل فوق الكوع  لان يبيلها طبه هههه .. زهبو يمكم خبز تنور وتمر للطواريء اذا بلعتو شوكه لا سمح الله ( ورح تبلعون  صدقوني ههه )  . .طاسه ماي عشان تغمسون فيها ايدكم بعد جم بقمه لان الشوك بيكون لازق  باصابيعكم ومرح ينزل الا بالماي .. قشور ليمون عشان تفركون ايدكم  بعد ما تخلصون لان الزفر مرح يروح الا بليمون ولا تفكرون تمسكون اي شي  بالسفره قبل الليمون لانه رح يمسك فيه الزفر  واخيرا وليس اخرا  هالنوع من السمج  يبيله لمه لا تسالوني ليش بس فعلا  ما يحلى الا بالتجمع

قدموها مع عيش محمر او خبز وعيش ابيض وفرقاعه  على هواكم  .. بالعافيه مقدما

المقادير حق  3 حبات  يعني تقريبا كيلو:

نص شده كزبره  مفرومه

نص شده شبنت مفروم

بصله كبيره مفرومه

5 فصوص ثوم مقطعه شرايح

علب فلفل يا كامل او مقطع حسب الرغبه

ليمونه شرايح منزوع منها البذور

البهارات حسب الرغبه ( كركم و بهارات سمج ولومي ناعم وممكن نضيف كزبره ناشفه  و كاري وفلفل اسود وفلفل احمر خشن حسب الرغبه)

صبار منقع بشوي ماي حار ومذوب معاه مهروس تمر او قفشه صغيره دبس تمر

ممكن نضيف زرشك حسب الرغبه بالحشوه

الطريقه :

نخلط  الصباره مع كركم وشوي بهار سمج  ونمسحها بالسمجه من داخل وبره بالجهتين

نخلط البصل والشبنت والكزبره والثوم  والفلفل ونبهرهم  بالبهارات وشوي من الصبار عشان يمسكهم مع بعض مع شوي زيت ( وممكن ندقهم بالهاون عشان يتمازجون اسرع ) ونحشي ببطن  السمجه ونرص جم حبه ليمون فوقهم

نكرر الخطوات بباقي السمج  … نصف باقي شرايح الليمون بصينيه الفرن ونرص السمج فوقهم ونحط شوي ماي بالصينيه يعني ربع كوب عشان لا يلزق فيها السمج

ندخلها فرن حار لين تستوي وتكتسب اللون الذهبي وتنوكل حاره وبالف عافيه

صبور مشوي

2 thoughts on “سمك صبور مشوي

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s