وصفات برنامج نكهه وبهار مع القصار · وصفات رمضانيه · اطباق رئيسية · اطباق رئيسية -الدجاج والطيور · اطباق شعبيه

جريش الدجاج بطريقه القصار ببرنامج نكهه وبهار

نكمل باجي سلسه وصفات القصار وهالمره باليريش .. يختلف اليريش ( الجريش ) الكويتي عنم السعودي اختلاف كلي من اللون وطريقه الطبخ وحتى الطعم …وهالاكله تعتبر من الاكلات التراثيه المرتبطه في شهر رمضان  مع الهريس وكان الحريم ناقصين تعب  بهالشهر  هههه … عشان تسهلون عمليه الضراب ( الهرس )  استخدمو مضرب التحريك بالمكاين الكهربائيه او خلوه يطبخ فتره طويله لين ينهري من نفسه وعمليه الضرب بتكون سهله ومتجانسه … استخدمت نفس الوصفه اللي ذكرها القصار الا اني قللت كميه الجريش بنسبه كبيره واستخدمت جيله بدال كيلو …الشغله الثانيه اني استخدمت نصيحه صديقتي الانستغراميه njat80 وخليتها بالفرن بدال الجوله وكنت اطلعها كل 10 او 15 دقيقه اخلطها واردها مره ثانيه وميزه الفرن  انه ما يحتاج ماي وايد وانه ما يحكك بالجدر واخيرا مع كل عمليه تحريك قاعد تتمازج المكونات تدريجيا

نصيحه اخيره … خلو يمكم علبه شوفان احتياط اذا حسيتو ان الماي زايد ممكن تستخدمونها  وتعدل لكم سمك اليريشه بالطريقه اللي تفضلونها

رح انسخ الوصفه  من موقع القصار  من هني  .. ووصفات اليريش الثانيه تحصلونها هني وهني  وهذا اليريش المنهنه هني وهني وهني

المقادير:

  • دجاجة كاملة مقطوعة نصفان 900 غ

  • بصلتان مفرومتان

  • 4 حبات طماط

  • جيله حب جريش منقوع بماء فاتر لمدة لاتقل عن 3 ساعات ومصفى

  • علبة معجون طماطم

  • 4 فصوص ثوم

  • 3 ملاعق سمنة

  • بهارات مشكلة م ص من كل من (كزبرة , كمون , فلفل اسود , كركم , لومي اسود)

  • نص كوب روب حسب الرغبة يوضع وقت الضراب

  • كمية وفيرة من الماء للسلق ( 5 الى 6 اكواب )

الطريقة :

  • يوضع البصل والثوم والسمنة وتقلب مع قليل من البهار

  • تضاف  انصاف الدجاجة وتوضع فوق البصل ويقلب الخليط لمدة ربع ساعة

  • يضاف الطماط المقطع وعلبة معجون الطماطم فوق الدجاج ويترك حتى يذبل الكل  , يضاف الجريش ويحرك مع الكل لمده دقيقتين ثم يوضع الماء الساخن واللومي الكامل  ويحرك حتى يغلي  ثم يوضع بالفرن ويترك لمدة ساعتين عالاقل مع التقليب كل 10 – 15 دقيقه

  • بعد ان تنضج الدجاجة ونصفيها من العظم ثم نرجعها الجريش ونضربها ونضيف الكمون المطحون والملح حسب الرغبة واذا احتاجت شوفان نضيفها بهلمرحله ونستمر بالتحريك والخلط حتى ينهرس وتتمازج كل المكونات مع بعض

  • يضاف كوب الروب وعصير نصف الليمونة ثم تسكب في ماعون التقديم وتدهن بالسمن العداني وتزين بالحشو وهو عبارة عن البصل المفروم المفروك مع اللومي الاسود

Advertisements

3 thoughts on “جريش الدجاج بطريقه القصار ببرنامج نكهه وبهار

  1. أهل حايل ايضا يعملونه بنفس هذي الطريقة البعض يسميه جريش حايل او رغيدة
    بس انا امس سويته ومشيت على هذي المقادير لاني اثق بتجاربك و رأيك و أثق بالقصار الله يطول بعمره
    و فعلا الحمدلله طلع شي خيااال كل شي موزون مع اني اول مره اسوي اكله شعبيه …
    الله يسعدك ويعطيك فوق ماتمنيتي ما اسوي شي من هذا البلوق الا ويطلع احلى مما توقعت

    1. ما شاء الله تسلم الايادي وعليكم بالف عافيه ومشكوووره على ذوقج و على الاضافات القيمه 🙂

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s