بسبوسة الكنافة

on

اخذت هالوصفه اللذيذه من عزيزتي الغاليه صديقه الانستغرام njat80  … سويتها اول مره وحققت نجاح تبارك الله بس كانت عندي ملاحظه صغيرونه ان طعم جوز الهند طاغي عليها فقررت اسويها مره ثانيه بنص كميه جوز الهند وزدت عليها ماي زهر وخلطت كذا نوع من المكسرات ضفت لها حليب بودر عشان يعطيها طراوه
اللي يحب جوز الهند يخلي المقدار كوب بدال نص كوب

هالبسبوسه ترفه جدا جدا ولذيذه جدا جدا … المقدار يعطيكم بايركس صغير مثل اللي بالصوره اذا تبون كميه اكبر ضاعفو المقدار …جربوها وادعولها وادعولي 🙂

المقادير:

كوب سميد ( كيفكم خشن او ناعم )

كوب شكر

كوب زيت

نص كوب جوز هند

م ك حليب بودر

2 بيض

م ص فانيلا سائله

م ص بيكنغ بودر ( والمفروض مع الوصفه الاصليه بيكربونات الصوديوم بطرف القفشه بس ما حسيت بفرق من غيرها  )

ربع علبه كنافه مقطعه باليد حسب الحجم المرغوب

زبده لتحمر الكنافه 2-3 صغار اتوقع كافي

لتسقيه البسبوسه : شيره بارده مضاف لها ماي زهر

الحشوه : على حسب رغبتكم بكميه المكسرات

نص كوب جوز مفروم خشن

3-4 م ك  لوز مفروم خشن

3-4 م ك فستق مفروم

3 م ك سكر بودر

1 م ك دارسين بودر

م ص ماي زهر

الطريقه :

نحمس الكنافه بالزبده ليما تتحمر ونتركها تبرد … نخلط كل مقادير الحشوه ونتركها

نخلط مكونات البسبوسه ( سميد وزيت وبيض وجوز هند وحليب وسكر وفانيلا وبيكنغ بودر ) اما بالخلاط الزجاجي او بالمكينه او حتى بملعقه خشبيه باليد لين تتمازج المكونات

ندهن البايركس بالزيت او بالهرده مثل ما تفضلون وتضيفون جزء من خليط البسبوسه  وبعدين المكسرات وجزء من كميه الكنافه  وفوقهم باجي خليط البسبوسه وفوقها باجي كميه الكنافه وندخلها فرن مسخن بدرجه حراره 170 ونتركها لين تنصج .. ولما تطلع نسقيها بالشيره البارده وزينوها بالفستق الناعم وزهبو مطاره القهوه وبالف الف عافيه

Advertisements

6 Comments اضافة لك

  1. Feryal Nobani كتب:

    رائعة جدا جدا و تسلم ايدك

    ________________________________

    1. bent el deera كتب:

      حبيبتي شكرا جزيلا وتعليقج الاروع :*

  2. Yasmeen كتب:

    حبيبتي بنت الديرة جم وقت تحتاج بالفرن؟

    1. bent el deera كتب:

      على حسب نوع الفرن ودرجه الحراره بس غالبا نص الى 40 دقيقه

  3. اريد المزيد من الاطباق الخليجية

    1. bent el deera كتب:

      انا حاليا باجازه مطبخيه … عندي وصفات كثيره بالبلوق اتمنى تحوز اعجابج

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s