review : محل دانه البحرين للمنتجات البحرينيه

يا حلو البحرين وحلو شعبها واهلها … المنتجات البحرينيه وخاصه الحلوى والمتاي مطلوبه بكثره لطعمها المميز … بهاراتهم بعد عجيبه ولا استغنى عنها … لقيت محل يبيع كل هالمنتجات وفناتقهم الحلوة وما يحتاج نوصي عليهم من البحرين

السبب الرئيسي اللي خلاني اروح له هالبهار ( بهار الدقوس )

من شفت سليمان القصار يسوي الكباب البحريني وقال هالبهار لازم يكون موجود .. الوصفه تلقونها على هاللينك

رحت العقيله مجمع النوخذه قبال البيرق ادور على محل دانه البحرين ( تلقونه بره ما يحتاج تدشون المجمع ) …المحل بصراحه صغير بس فيه كل شي ما شاء الله

صينيه البهارات البحرينيه الخنينه … الحجم الصغير اذا ماني غلطانه سعرها 3.500

فناتق اهل البحرين مرشات ماي ورد وماي لقاح وزموته والزعتر وغيره  .. عجبوني ملوت ماي الورد وقمت ارشش على ويهي بالحر يبرد وهم يعطي نضاره 🙂 … وطبعا عندهم الغراش الصغيره حق الشاي والماي وغيره

شوفو شحلاتهم اعتقد سعرهم 2.000… اللي تحته درابيل بحريني( نشاب ) ما سالت عن سعره … وهذا ماي الورد اللي اخذته

هالشي الكيوت عباره عن اجار (طرشي) خضار صغير مغلف فردي حجمه نتفه يهبل … اعتقد هم سعره 2.000 او2.500

شوفو شحلاته كيوووت

اللي يم البطاط خلطات جاهزه لبعض انواع العجاين مثل الكباب البحريني والبيتزا واللقيمات وغيرها اسعارهم 2.000 واللي يمهم ماي مخلوط بماي لقاح وتمر وللاسف نسيت اسعارهم

وطبعا الحلوى الشهيره والسمبوسه البحرينيه اللذيذه بالنوعين المشويه والمقليه ومتاي احجام بالفلفل وغيره وسعره 1.000 و 2.000

وكل انواع الاجارات ( الطرشي ) البحريني والمعابيج  واسعارهم تتفاوت بين 1.500-2.500 وانواع المعمول وخلطات القهوه

العنوان بالتفصيل وارقامهم تحصلونه بالصوره .. والحلو ان عندهم توصيل بعد

الإعلان