سلطة الكينوا بطريقه شهد

اخت عزيزه وغاليه ربي حب يكرمني وعرفني عليها من خلال برنامج انستقرام .. طباخه ماهره جدا جدا وروحها حلوة واسلوبها ينقط عسل واخلاقها تنم عن تربيه رائعه حظيت فيها

شاركتني بهالوصفه الحلوة اللذيذه بالواتس اب وحبيت اشاركم فيها اولا لان شكلها لذيييييذ و ثانيا وهو الاهم عشان تحصل منكم دعوه حلوة بظهر الغيب لاني متاكده ان هالوصفه بتعجبكم وفوق هذا سهله وسريعه

شهوده حبيبه قلبي مشكوره وايد وتسلم الايادي على هالوصفه الرائعه 🙂

المقاييس المذكوره تقريبيه بالامكان الزياده والنقصان لاي مكون حسب الرغبه وبالامكان استبدال الكينوا بالبرغل

المقادير :

كوب كينوا مطبوخه او برغل

2 شده او ربطه بقدونس مفروم

1 شده او ربطه كزبره مفرومه

1 ربطه او شده نعناع مفروم

2 حبه رمان

ربع او نصف كوب مكسرات محمصه  ومجروشه خشن ( كاجو وفستق ولوز و فول سوداني )

الدريسنغ او الصلصة :

4 ملاعق كبيره صلصه ايطاليه جاهزه  ( الشفافه )

عصير ليمونتين

2-3 ملعقه كبيره زيت زيتون

1/4 كوب دبس رمان

ملح وفلفل حسب الذوق

الطريقه :

تخلط جميع المكونات الصلصه

تخلط مكونات السلطه وتصب الصلصه عليها حسب الذوق وتقدم وبالف عافيه

الإعلان