الذ شي بسفره رمضان
هذي وصفه ثانيه لخبز العروق بالخضار ( الوصفه الاولى على هالرابط وباقي الوصفات هنا وهنا هنا هنا وهنا وهنا .. السر انكم تخلون الخليط يرتاح وكل ما ارتاح اكثر كل ما عطاكم نتيجه مرضيه
اذا تحبون ممكن تضيفون بيضه للخليط
انا استخدمت الطحين الابيض الكامل ( يعني نفس فوايد الاسمر) انتو تقدرون تستخدمون النوع المتوفر عندكم
بسم الله نبتدي
المقادير :
2 كوب طحين ابيض كامل او اسمر او ابض عادي
شده كرفس
شده كزبرة
شدة بصل اخضر
2 شده بقل ( كراث او كرات )
2 شده شبنت ( شبت )
2 حبه طماط مفرومين ناعم
1 جزره مبشوره
1 كوسه مبشوره
حبه فلفل اخضر مفروم ناعم
حبه بصل كبيره مفرومه ناعم
½ م ص كركم
1 م ص كزبره بودر
1 م ص كمون
1 م ص بهار مشكل
1 م ص كاري
¼ م ص فلفل اسود
½ م ص فلفل احمر او بهار الدقوس
½ م ص ملح الليمون او عصير ليمونه
ماء للعجن ( حوالي نصف كوب او اقل )
ملح حسب الرغبه
الطريقة :
يخلط الطحين مع البهارات
تفرم كل الخضار الورقيه وتعجن مع باقي الخضراوات ثم يضاف لها الطحين والماء بالتدريج
تترك لترتاح على الاقل ساعه
تقلى بزيت ساخن وتقدم فورا
بالصحه وتقبل الله طاعاتكم
My Kitchen 
مرحبا حبيت اشكرك على هذي المدونة الرائعة دايما احب كل فترة اشيك عليها اشوف ايش الجديد جدا استفدت منك الله يعطيك الف عافية
امس شفتك بالانستجرام مسوية كبة المموش واغرتني جدااااا فحبيت اسويها لبكرا ان شاء الله بس كنت ابي اسألك انا ماعرف ايش دقوس لصبار نهائياااا شريت باكيت تمر هندي صغير وعندي الجاهز MF اقدر استخدم الجاهز بدال الباكيت؟
والباكيت ايش اسوي فيه بالضبط لاني ما ادري انقعه واخذ مويته ولا انقعه واخذ الللب والمويه؟
شكرا على الكلام الحلو وايد اسعدني و الصبار حبيبتي تنقعينه بماي حار وتصفينه من البذور وتستخدمين المنقوع والحين متوفر بالجمعيات بعلب جاهز ما يحتاج نقع و بالنسبه لدقوس الصبار تقدرين تستخدمينه بالعلبه ساده من غير شي اذا تحبين الحموضه او تحمسين شوي ثوم وكزبره وتضيفين له الصبار المنقوع بالماي او من العلب وتخلينه على النار لما يثقل والبهار ملح وفلفل اسود او اي بهار ثاني تحبينه :)) و حبيبتي مشكووووره على ذوقج وايد فرحتيني