اذا تحبون الخبز الايطالي و تبون وصفه سهله .. هذي الوصفه المطلوبه
وايد سهله وما تحتاج عجن وكل مكوناتها متوفره … بالنسبه لي احب الفوكاشا سميكه / خميله بس اذا تبونها اضعف رقوها بصينيه اكبر وطبعا تقدرون تنوعون بالاعشاب والاضافات حسب الرغبه سواء كانت طماطم مجففه او زيتون او بصل مكرمل الخ
الوصفه من حساب المبدعه smitten kitchen نقلا من كتاب Bread Toast Crumbs باضافات بسيطه
بسم الله نبتدي
المقادير : ( لصينيه واحده )
- 4 اكواب طحين ( استخدمت 2 كوب طحين اسمر +2 كوب متعدد الاستخدام / ابيض)
- 2 م ص ملح
- 1 م ص خميره فوريه
- 2 كوب ماء دافي
- 3-4 م ك زيت زيتون
- 1/4 كوب بقدونس مفروم او اي خليط من الاعشاب
- 1 م ط اوريغانو مجفف او اعشاب ايطاليه مجففه+ كميه اضافيه للوجه
- 1/2 كوب خميره طبيعيه /ساور دو ( اضافيه وغير ضروريه بس انا احبها بالمعجنات )
الطريقة:
نخلط الطحين ونوعين الخميره مع الملح والماي و الاعشاب لما تتمازج المكونات ( العجن مو ضروري ) مع ملاحظه ان العجينه لزجه
نغطيها ونتركها تتخمر لمده ساعتين بحراره الغرفه او بالثلاجه حوالي 12 ساعه تقريبا
نضع قليل من زيت الزيتون بصينيه الخبز ونفرد العجينه بعد التخمير
نضغط وجه العجينه باصابع اليد لعمل جيوب ونسكب باقي الزيت ونرشها بالاعشاب المجففه ونتركها تتخمر لمده ثلث الى نص ساعه تقريبا
نخبزها بفرن متوسط الحراره حتى تنضج تقدم بجانب غموس زيت الزيتون بالخل بالبسلمي او كستدويشات مع اللحوم البارده والاجبان او مع كالوصفه اللذيذه وبالصحه