ساندويش تونا بتتبيله green goddess

منو ما يحب التونه؟؟

صنف عملي ، صحي ، لذيذ ، وسهل نسوي منه عده اطباق سواء سلطه او اطباق الفرن او الباستا او ساندويشات او حتى حشوة مع البطاط المشويه

طبعا بتلقون وايد أصناف بالمدونه هني وهني وهني وهني  وهني وهني وهني

احب تونه قودي لانها ما تخيب ظني بكل مره اجربها

التتبيله اسمها green goddest  تقدرون تستخدمونها مع أي سلطه … خففت الدسم بتبديل بعض المكونات بالافوكادو وبذكرها كما هي وتعديلاتي

انصح أي احد ما يحب التونه يجرب هالوصفه وبتغير رايه

بسم الله نبتدي

الكميه تكفي تقريبا 4 ساندويشات من الحجم الظاهر

للصلصه

• ¼ كوب أوراق بقدونس
• ¼  كوب أوراق طرخون
• ¼ كوب أوراق ريحان
• 1 م ص زيت زيتون ( بالوصفه الاصليه  2 م ك )
• 1 حبه افوكادو صغيره ( بالوصفه الاصليه فيها ربع كوب ساوركريم و ربع كوب مايونيز )
• 1 بصل اخضر مفروم او بصله ابيض صغيره حسب الرغبه
• 1 عود سالاري مفروم
• عصير ليمونه + بشر الليمون

لباقي مكونات الساندويش :

• 2 علبه تونه حجم كبير
• اوراق خس مشكله
• صمون او توست او خبز ساوردو
• ملح وفلفل اسود وثوم بودر حسب الرغبه

الطريقه :

بالخلاط نخلط الافوكادو والزيت وعصير الليمون والبشر مع البقدونس والطرخون والريحان

نشخل التونا من الماي ونخلطها بالخلطه مع البصل الاخضر والسالاري والبهارات

نحشيها مع الخس اواي اوراق تفضلونها ( جرجير سبانخ اوراق مسترد او براعم بروكلي كرفس …الخ)

جدا جدا جدا لذيذه حتى اللي ما يحب التونه بيحبها

وتقدرون تبدلون الاعشاب حسب المتوفر عندكم حسب الرغبه بس الاساس الريحان والبقدونس والبصل الاخضر

الإعلان