I love to cook .. love to eat .. and this is my kitchen

Category Archives: اطباق رئيسية

كبده دجاج

لذيذه وسهله ومفيده .. مكوناتها جدا سهله وممكن تغيرون بانواع الخضار وتضيفون لها فلفل ملون او تبدلون البقدونس بالكزبره المفرومه واعتقد اهي نفسها الكبده الاسكندراني بس تكون بكبد العجل .. وممكن تضيفون لها بعد بطاط مقلي يمي … ممكن توكل ساده مع سلطه او تغمس بخبز التنور وشخصيا افضلها ساندويشات مع جرجير و اوراق ريحان وبطاط مقلي

المقادير:

علبه كبده طازجه منظفه ومقطعه حسب الرغبه

بصله جوانج

نص حبه فلفل اخضر ( فليفله ) مقطع جوانج

حبه طماط مقطعه جوانح

2 م ك بقدونس مفروم

1/4 م ص فلفل اسود بودر

1/2 م ص كمون

1/2 م ص بزار بحريني او بهار كويتي اوهندي ( غرام ماسالا ) او اي نوع بهار

1/2 م ص ليمون عماني بودر او تبدل ب م ص عصير ليمون اخضر (لايم)

م ص ملح

1/4 كوب ماء

زيت زيتون حسب الرغبه

الطريقة :

نحمر البصل بالزيت ونضيف له الفلفل والبهارات ونرفع النارعشان تكون المقلا حاميه نضيف الطماط والكبده ونقلبهم ليما يتغير لون الجبده وبعدين نضيف والملح والماي والبقدونس ونتركه كله على النار لما يستوي ويتبقى صلصه ثقيله وينوكل بالف عافيه


mexican rice

هالوصفه تشبه العيش ( الرز ) اللي يتقدم بالمطاعم الامريكيه مثل فرايديز و تشيليز … الوصفه جدا سهله وطيبه .. الرز المستخدم الامركي طويل الحبه الشهير ( انكل بنز ) … قدمت معاها فاهيتا دياي ( دجاج )

عندي وصفه لذيذه للفاهيتا موجوده على هالرابط 

المقادير :

حبه بصل مقطع مكعبات

نصف حبه فلفل اخضر ( فليفله ) مقطع مكعبات

حبه طماط مقطعه مكعبات

نص علبه صلصه بولونيز باستا جاهزة ( استخدمت ماركه ديلمو)

2 كوب ارز امريكي

كوب ذره

2 ملعقه كبيره كزبره مفرومه

1/2 ملعقه كبيره كمون ناعم

ملعقه كبيره بهار الفاهيتا ( استخدمت ماركه ماجيك )

1/2 ملعقه صغيره كزبره ناعمه

زيت حسب الرغبه

ملح حسب الرغبه

4 كوب ماء ساخن او مرق دجاج

الطريقه :

نضيف الزيت بوعاء  الطبخ ونضيف العيش ( رز ) والبصل بنفس الوقت ونقلبه لما يتغير لون البصل ويصير شفاف تقريبا ويتغلف بالزيت ونضيف له البهارات واذا تحبونه سبايسي تقدرون تضيفون للبهارات فلفل احمر بودر

نضيف الفلفل والذره والكزبره وصلصه الباستا ونقلب الكل ونضيف له الماء واخر شي حبه الطماط عشان تحافظ على شكلها وما تهتري

نتركه يغلي وبعدين نخفف النهار ونتركه ينضج على نار هاديه … يقدم مع الدجاج او السمك المشوي او الفاهيتا وبالف عافيه


فكره حلوة لتغيير طعم العيش ( الرز المعتاد )… في وقت شخال العيش اقلو الخضار وتيكونون مستوين مع بعض

الطريقه :

رز مسلوق عادي ونضيف له قطع من الخضراوات المقليه او المشويه او حتى المسلوقه … تضاف لها ملح وفلفل اسود وبهار … الخضار المستخدمه مكعبات من الجزر والكوسا والبطاط مع زهره ومشروم وبصل مقلي

لذيذه مع روب ( زبادي ) او دقوس طماط او اي ايدام مشوي

بالعافيه


دياي بالفرن

استخدمت جهازي المفضل قيلبس ايرفراير لخبز الدياي .. هالوصفه حلوه للي يبي يحافظ على وزنه  وبنفس الوقت مشبعه … مرج اجذب عليكم الدياي طلع شوي ناشف يمكن لو قدمتوه مع صلصه او بطاط مهروس افضل من انه يكون بروحه مع البروكلي

المقادير حق 2 فيليه دياي

المقادير :

نص كوب لبن

 م ص بابريكا

نص م ص كمون او بهار دجاج

نص م ص اوريغانو

نص م ص اعشاب ايطاليه مخلوطه

نص م ص ثوم بودر

م ك خردل ديجون

ملح وفلفل اسود حسب الرغبه

بقسماط للتغطيه ( بانكو )

نص م ص زيت زيتون

الطريقه :

نخلط اللبن مع نص كميه البهارات المذكوره و ملعقه الخردل  ونتبل فيه الدياي ويفضل يوم كامل

نخلط باقي البهارات مع البقسماط وزيت الزيتون

نشيل الدياي من خليط اللبن ونلته بالبقسماط ونحطه بصينيه الفرن الساخنه او بالجهاز

دجاج بالبانكو قبل الخبز

اول ما يستوي الدياي ويتحمر نشيله ونقدمه وبالف عافيه

دجاج بالبقسماط بالفرن


اخذته قبل فتره وحبييييته جدا جدا .. اهو عباره عن فرن صغير نقدر نسوي كل الاطباق اللي نسويها بالفرن عاده بالاضافه الى تحمير بعض الاصناف اللي تنوكل عاده بالقلي مثل البطاط او النجتس او الهوت دوغ وغيرها

الجهاز حجمه صغير ..  يعني يسع حق كميه اكل تكفي حق شخصين ومع الجهاز عازل لخبز صنيفين بنفس الوقت … ينباع صينيه خاصه تدخل بالفرن للاشياء السائله اوخليط الرطب ( لان بقاعده الجهاز شبك فما ينفع لكل الاصناف )

اول الاصناف اللي جربتها فيها كانت البطاط ( طبعا !!).. وكانت النتيجه جدا حلوه لان الفرن ساخن فاستوت البطاط بوقت اسرع من الفرن العادي بالاضافه الى انه كسب قرمشه حلوه … مرح ابالغ واقول انه احلى من البطاطا المقليه لكنه شي لذيذ وبديل بنفس الوقت

بطاط صحي مشوي لذيذ

البطاط تبلته بملح واريغانو وثوم بودر وبابريكا واقل من نص قفشه صغيرة زيت زيتون … الربيان ملح وفلفل اسود وبهارات سمج وهم شوي زيت زيتون

النتيجه جدا مبهره وانصح كلي اللي يحب الاكل الصحي او انه يطبخ لشخص واحد او شخصين ياخذه


20121226_153043

 احب التونا و كل تغيير بسيط فيها يعطي طعم مختلف بالاضافه الى انه وجبه مشبعه وصحيه خاصه اذا بدلنا المايونيز بمكون ثاني … بالشتا انصحكم ترافقونها مع بطاط مشوي وبالصيف حطوها بساندويش والافضل توست محمص مع سلايس جبن اخف… البطاط خبزنه بجهازي المفضل اليديد philips airfryer

اذا تبون تقدرون تحسون التونا بالطاط بعد ما تفرغونه وتردون تدخلونه الفرن مره ثانيه … التونا المستخدمه ماركه قودي واهي افضل نوع تونه جربته للحين

المقاديروالطريقه :

نصفي علبه تونا  من الزيت تماما وبالشوكه تفتتها ونضيف عليها بصل  مفروم ناعم +فلفل ملون مفروم ناعم + قفشه كبيره زيتون شرايح ونبهر المزيج كله بملح وفلفل اسود وبهار شيلي ( مكوناته فلفل احمر وكمون وثوم بودر ) ورشتين تباسكو وديجون مسترد مذوب بشوي عصير ليمون وتقريبا م ص زيت زيتون عشان ينخلط بشكل اسرع مع التونا

نحط هالمزيج كله فوق شرايح من الخس المبشور  ونقدمه مع بطاطه مشويه وبالعافيه



تابع

Get every new post delivered to your Inbox.

Join 1,096 other followers