burgers · مشروم او الفطر او عش الغراب · وصفات صحيه قليله السعرات او الدهون وتصلح للرجيم · السندويشات · اطباق رئيسية · اطباق رئيسية- لحوم

برغر صحي ولذيذ

برغر سريع ولذيذ

ما احب البرغر المجمد الجاهز لعده اعتبارات اولها بروتين الصويا ونوع اللحم المستخدم والمواد الحافظه… البرغر المنزلي سهل جدا لذيذ جدا وتتحكمون بالاضافات المرغوبه حسب الرغبه

ممكن اضافه اي نوع بهار او توابل او خضار للبرغر وممكن تحشى بانواع الجبن او المشروم وممكن تقدم بحجم صغير ” سلايدر ” مثل ما علمت بهالوصفه

هذي مقاديري للبرجر السريع وممكن اضافه للمقادير حبه بصل مفرومه مشوحه بالزيت لنكهه مختلفه او انواع الفلفل المشوي والمزال عنه القشر  مع البهارات الفاهيتا لنكهه مكسيكيه

المتعارف عليه ان اللحم للبرغر لابد ان يكون به نسبه من الشحم .. بوصفتي استخدمت مكعبات لحم خاليه من الشحم وفرمتها بالبيت واضفت اليها كميه بسيطه من الزيت عشان تمسك ببعضها

المقادير : تعطي 15 حبه بحجم السلايدر او 8 بالحجم العادي

كيلو لحم مفروم
ربع كوب صلصه باربيكيو
2 م ك كتشب
ربع ملعقه صغيره اعشاب مجففه ( اي نوع حسب الرغبه )
2 م ك زيت نباتي
1 م ص فلفل اسود
1 م ص ملح
نصف كوب بقسماط

صلصه المشروم ( الفطر ) المصاحبه للبرغر : الوصفه من كتاب لقمه من اصدارات المطاحن لانتصار المطوع :

كوب مشروم مقطع

1 م ك زيت

ملح وفلفل اسود

1/2 كوب ماء

1/2 م ك طحين او دقيق

1/2 م ك صلصه باربيكيو

1/2 م ص خلاصه الخضار ( ارض الطبيعه )

طريقه الصلصه :

يشوح المشروم المقطع بالزيت ويضاف الملح والفلفل الاسود وخلاصه الخضار  والطحين وتقلب لمده دقيقتين ثم يضاف الماء والصلصه وتترك لتتكثف

الطريقه لعمل البرغر :

تخلط مكونات البرغر ( ولا نبالغ بالخلط ) وتشكل على هيئه اقراص مع الضعط عليها .. استخدمت مقدار ثلث كوب كأداه للتشكيل

برجر سريع ولذيذ

يضغط عليها بخفه لتشكيل القرص الدائري وتثلج لحين الاستخدام والهدف من التثليج حتى تحافظ على شكلها عند الشوي  ( في حال استخدام لحم مدهن ممكن ان تشوى بعد ان ترتاح لنص ساعه  ولا حاجه للتثليج )

برغر لذيذ وصحي

تسوى على صاجه او شوايه ممسوحه بالزيت وتقدم بخبزه محمصه وممسوحه بالمايونيز والمسترد ( الخردل الاصفر) مع صلصه المشروم والخس والطماطم وبالف عافيه

برغر صحي ولذيذ

burgers · jamie oliver recipes · من هنا وهناك · السندويشات · اطباق رئيسية · اطباق رئيسية- لحوم

برغر جيمي اوليفر

 

لذييييييييييذه وترفه … اللحم اللي استخدمته مفروم فرش بالبيت … مع انه غنم بس ما كان زفر كلش… اخذته من مجله فتافيت عدد مايو 2011

شوفوا شحلات شكله … جربته نفس الوصفه بالضبط وهم جربته مع حبن الفيتا وكل مره له طعم حلو .. اذا تبونه نفس الوصفه ضيفو له طماط وريحان وجبن حلوم وصلصه الشمندر

المقادير : المفروض تعطيكم 4 حبات برغر بس انا طلعت لي 6

بصله متوسطه مفرومه ناعم

اريغانو ربع قفشه صغيره

حبه فلفل احمر مفروم من غير بذور  ( الحار )

بشر وعصير ليمونه كامله

نص شده بقدونس بس الاوراق مفرومه

بيضه

ملح

فلفل اسود

ربع كوب بقسماط + كميه اضافيه حسب الحاجة

نص كيلو لحم مفروم ( غنم )

طماط وخس ومايونيز واي شي تحيونه مع البرغر

انا حطيت طماط وخس وجرجير وجبن فيتا

الطريقه :

نحمس البصل مع الاوريغانو بزيت الزيتون  لين يتغير لونه وبعدين نبرده ونضيفه حق الفلفل المفروم واللحم والبقدونس وبشر  الليمون مع عصيره والبيض ونخلطه باليد ونضيف البقسماط بالتدريج لين نحصل على تركيبه البرغر .. نقسمه الى 4 او 6 ونشكله دوائر وبعدين نحطه بالثلاجه او الفريزر يرتاح

نسخن الشوايه ونشويه عادي من 12- 15 دقيقه لحد ما يستوي وباخر دقيقتين نحط الجبن عشان يذوب

ونقدمه بالخبز مع المكونات اللي تحبونها وبالف عافيه

burgers · مشروم او الفطر او عش الغراب · معجنات وفطاير · اطباق رئيسية- لحوم · خطوة بخطوة

خطوة بخطوه : معجنات البرغر

رح انزل خطوات معجنات البرغر .. الصور مو واضحه لانها من موبايلي بس اتوقع الفكره واضحه. :>

ومثل ما قلت لكم استخدمو ربع كرافت سلايس السميكه طعمها بيكون احلى .. هالمره انا ضفت لها حمسه مشرم طريقتها بعد ما شويت البرغر حمست المشروم بالزيت اللي نزل من اللحم وضفت له ملح وفلفل اسود

االمقادير والشكل النهائي تلقونه هني

معجنات البرغر 1
المواد الجافه بالعجين… طبعا تقدرون تضيفون لها اي شي ثاني تحبونه مثل البابريكا.. نخاله.. شوفان … طماط مجفف … شبنت …بذور حب شمسي او حب قرع الخ … ونضيف لها المكونات السائله ونخليها تخمر لين يتضاعف حجمها
معجنات البرغر 2
بعد ما خمرت نقطعها على هيئه كور ونخليها ترتاح شوي  تقدرون تغطونها اذا تحبون على مانشوي البرغر ونخليه يبرد .. 
معجنات البرغر 3
نفرد العجينه
معجنات البرغر 4
نضيف المكونات.. البرغر المشوي وشوي من صلصه مايوتشيب 
معجنات برغر 5
نحط شريحه جبن او 2 اذا تحبون.. بس وحده اتوقع كفايه
معجنات البرغر 6
واخيرا وليس اخرا المشروم … وبعدها نطبقها على هيئه كره ونمسح ويها بالبيض المخلوط بالفلفل الاسود والماي ونرش عليها سمسم وندخلها الفرن لين تستوي وبالف عافيه
burgers · معجنات وفطاير · اطباق رئيسية- لحوم

معجنات البرغر اللذيذه

 هالوصفه رح تعجب محبين البرغر ..اخواني الله يحفظهم استانسو عليها وايد … وتره حدها حدها سهله… تخيلو معاي عجينه محشيه برغر وجبن تشيدر ذايب يم يم

اختي طالبتني اني انزل الوصفه بالتفصيل وحذرتني من اني اترك اي تفصيل مبهم فرح تكون هالوصفه بالشرح الممل بالتفصيل وصور الخطوات بتحصلونهم هني…. البرغر المستخدم سلايدر خزان واذا تحبون تسوون البرغر بالبيت خلطو لحم  مفروم وبصل وصلصه الستيك مع كتشب وملح وفلفل اسود … الجبن المستخدم جبن سلايس كرافت السميكه… بالعجينه استخدمت طحين اسمر اذا ما تحبونه خلو كل المقدار طحين ابيض بس قللو فتره التخمير بربع ساعه

بسم الله نبتدي

المقادير :

مقادير العجينه :

كوب ونص طحين اسمر

كوب طحين ابيض فاخر + 2-3 قفاش كبيره

ربع كوب بودره البطاط اللي نستخدمها بالبطاط المهروس

قفشتين كبار حليب بودر

نص قفشه صغيره كمون

نص قفشه صغيره بودر البصل المجفف

قفشه كبيره خميره فوريه

قفشه صغيره بيكنغ بودر

قفشتين كبار شكر

قفشه صغيره ملح

كوب ماي دافي

ربع كوب زيت ذره

مقادير الحشوه :

برغر صغار

جبن سلايس

بيض مخفوق مع ملح وفلفل اسود للويه مع سمسم

الطريقة:

  نخلط كل مقادير الطحين الاسمر وكوب طحين الابيض و رقائق البطاط المجفف مع الكمون والبصل البودر والملح والشكر والخميره والبيكنغ بودر والحليب وتالي نضيف لهم الماي والزيت ونعجنهم واذا شفنا انها محتاجه طحين زود نضيف باجي الطحين الابيض

نخليها تعجن فتره لا تقل عن 7 دقايق وبعدين نعجنها بالايد مرتين عشان نتاكد انها متماسكه ونحطها بوعاء ممسوح بالزيت ونتركها تخمر لمده ساعه

بعد ما تخمر نطقها بوكس عشان نطلع الهوا اللي فيها ونقسمها حق كور صغيره ونخليها ترتاح ربع ساعه تقريبا على ما نشوي البرغر .. تقريبا طلع لي 12 كره

نسخن الشوايه ونحط عليها البرغر  وناخذ كل مربع جبن ونقطعه حق 4 شرايح وقبل لا يستوي بشوي نحط ربع جبن سلايس فوقه

نسخن الفرن على حراره 180

نفرد العجينه ونحط البرغر بالجبن بالنص ونسكره عشان ياخذ شكل صمون البرغر المدور

نمسحهم بالبيض ونرشه بالسمسم وندخله الفرن تقريبا 10-15 دقيقه حتى يتحمر ويستوي وينوكل وهو حار وعليكم بالف عافيه

burgers · فطور رمضان و ريوق و سفرات كاملة · كوسا · وصفات كباب او خبز عروق · وصفات رمضانيه · اطباق جانبية · اطباق شعبيه · خطوة بخطوة · رمضان

خبز عروق خضار


الحلو بهالوصفه ان مالها مقادير واللي تحبونه حطوه… 





انا منزله اكثر من وصفه بالبلوق حق  خبز العروق العادي اللي مع لحم



هالوصفه تقدرون تاكلونها عادي او تسوونها نفسي ساندويشه مع حلقات طماط مشوي  او مقلي وجرجير و صلصه الروب مع نعناع او ريحان مع ملح وفلفل اسود وثوم وشويه جبن ابيض  >>>> تيننننننن هذي بالنسبه لي الالتميت فيجي برغر



المقادير والطريقه كلها حسب الرغبه :

خضار ورقيه مقصصه صغار ( بقدونس ، بصل اخضر ، شويه نعناع ، سلق ، بقل ، كزبره ، شبنت … الخ) ونحط عليهم بطاط مبشور وجزر مبشور وبصل مفروم صغار وطماط مبشور وكوسا مبشوره وشويه فلفل اخضر ونخلطهم عدل وبعدين نضيف الطحين وقفشه روب وشويه ماي وبهار ولومي ناعم وكمون وكاري كركم 
وخلوها على كتر لين تتجانس المكونات… قبل لا تقلونها ضيفو لها بيضه ( وتقدرون تلغونها) واقلوها بزيت ساخن لين تتحمر وعليكم بالف عافيه

 

burgers · اطباق رئيسية- لحوم · خطوة بخطوة

خطوات البرغر..

في ملاحظتين  نسيت اذكرها في البرغر .. البرغر لا ينخلط وايد  لان طعمه بيفرق.. الشي الثاني اللحم لازم يكون شوي رطب بعد الخلط اذا كان ناشف تقدرون تزيدون ماي او نص علبه شوربه  مشروم او بصل  او بيضه صغيره
الحين بحط لكم صور الخطوات للتوضيح والمقادير تحصلونهم here:
هني صور الصلصات اللي استخدمتهم
شوفوها شلون رطبه مو ناشفه … هني انا ماحتجت ازيدها بقسماط فشكلتها على طول
هذا الحجم العود يطلع لي تقريبا 10 حبات لكل كيلو لحم
وهذا الحجم الاصغر
بعد ما قلبتها وحطيت الجبن يذوب
بعد ما حمصت الخبز احطه فوق عشان اقلبه على طول
حياكم
burgers · مشروم او الفطر او عش الغراب · السندويشات · اطباق رئيسية · اطباق رئيسية- لحوم

volcano burger … او برجر البركان من تاليفي

 
هالوصفه دسمه المفروض انها تنزل امس تكمله لوصفه البرغر… من اول قرمه رح تنزل منه عصارات من البرغر  تشبه البركان>> تشبيهات
 
وصفه البرغر  نفسها اللي استخدمتها امس تلقونها بالبلوق … الباربيكيو صوص اللي استخدمته ماخذته من ماكدونالدز .. المشروم تقدرون تحطون البورتبلو بدال النوع العادي والبصل اللي بالوصفه تقدرون تستبدلونه بحلقات بصل  .. البيكن اللي استخدمه من خزان مكتوب عليه شرايح لحم الافطار 
احسن طريقه انكم تشون الكل بمقلاه كبيره وتكودونهم كلهم يم بعض
 
المقادير والطريقة :
نحمس المشروم بالزبده ونضيف لها ملح وفلفل اسود  
نخلي المقلاه حاره ونضيف لها البرغر ونخليه على ويه واحد وبعدين نقلبه ( ولا تحركونوه وايد قلبوه مرتين وكافي ولا تخلونه على النار وايد عشان لا يصير قاسي ) وقبل لا يستوي نضيف له  شريحتين جبن تشيدر ( انا ضفت شرايح كرافت سميكه )  او اي جبن ثاني تحبونه
نضيف البيكن على النار بنفس وقت شوا البرغر عشان يمديه يستوي ويقرمش بس حطو ببالكم انه يستوي مع البرغر لانه اذا برد بيصير قاسي بالمضغ
اول ما نحط البرغر على النار نقصص شرايح بصل ابيض ونضيفه اول ما نقلب البرغر ونخليه يستوي من دهن البرغر والبيكن ونضيف له ملح وفلفل اسود ووشسترصوص وشوي شكر اسمر 

نحمص ويهين البرغر اما بالمقلاه او بالفرن عشان تستحمل المكونات وما تصير رطبه  ونضيف لهم مايوتشيب وبعدين خس وبعدين البرغروالجبن الذايب والبيكن

وصلصله الباربيكيو والمشروم والبصل ويه الخبزه الثاني
يعني بالترتيب

  • نقصص البصل والمشروم ونزهب باجي المكونات
  • نسوي المشروم ونشيله لانه ما يحتاج وقت عشان يستوي
  • نحط البرغر
  • نضيف البصل واذا ذبل نضيف باجي المكونات
  • نقلب البرغر 
  • نحط البيكن
  • نقلب البرغر مره اخيره ونضيف عليها الجبن
  • نحمص التوست
  • نطبق البرغر وبالعافيه
 
قدموه مع بطاط مقلي  او حلقات بصل او سلطه كولسلو وبالف عافيه