مجبوس السمج من الاطباق المفضله عندي… نزلت وصفه قبل هالمره وباقي لي وصفه المجبوس المكسر وباذن الله اول ما اسويها انزلها بعد ومثل ما اقول لكم دايما اضافه الطماط والمعجون حسب الرغبه وانا يعجبني المجبوس الاحمر :> … الاختلافات بينها وبين هالمجبوس بسيطه اغلبها بنوع وكميه البهار …عاده ما اقلي السمج وانا اشوفه اخف واحلى … الحشو تقدرون تضيفون له اي نوع مكسرات تحبونها او خضار ورقيه
المقادير:
سمج شعوم كبيره مقصصه او عدله حسب الرغبه
بزار بحريني
بهار سمج ( مجدي )
بزار عادي
هيل ناعم
لومي عدل
دارسين عدل
هيل عدل
بهار ( استخدمت بهار حشو سمراء عدن )
كزبره بودر
بقدونس مفروم
طماط مفروم
بصل
ثوم مهروس
زنجبيل مهروس
معجون طماط
زرشك
ملح
ماي
عيش منقع
زيت نباتي
طحين وعصير ليمون لتنظيف السمج
الطريقه:
نغسل السمجه عدل ونسفطها وبعدين ننقعها بليمون وكلح خشن 15 دقيقه و بعدين نلتها بطحين ونغسلها عدل
نتبلها بثوم و زنجبيل مفرومين ونخليها على جنب
نحمس البصل لين يذبل وبعدين نضيف له الثوم والزنجبيل و البزار والبزار البحريني وبهار السمج والكزبره الناعمه والبهار وبعدين نضيف الطماط وندقها بظهر القفشه عشان تنهرس وينزل مايها
نضيف اللومي والهيل والدارسين والبقدونس والملح ونضيف شوي ماي ونتركهم لين يذبلون عدل
بهالاثناء نبهر السمجه ببزار وبهار وليمون واذا ذبلت الحمسه نحط السمجه فوقهم على النار ونقلبها بشويش عشان لاتقتت … نضيف الماي والمعجون ونتركها تطبخ
عند ثلاث ارباع نضج السمجه نشيلها ونحطها بصينه الفرن الممسوحه زيت ونبهرها بهيل ناعم ولومي ودارسين ناعم وبهار وندخلها الفرن لين تتحمر
وعند غليان المروق نسقط العيش عليه ونتركه لين يشرب مروقه وبعدين نوطي على النار ونطره لين يتسكر عدل
نسوي الحشو بتحمير البصل بالماي بالبدايه واذا ذبل نضيف الزيت وبعدين نضيف الزرشك المنقوع والبهار و اللومي والهيل وشوي ملح
My Kitchen 
اختي العزيزةمدونتج رائعة جدا…. شوقتيني على الأكل،والرجيم بايباي:)
إمـرأة لا تُنسـى****************مشكووره عزيزتي الغاليه وهذا من ذوقج :>شهادتج اعتز فيها جدا *%بالنسبه للرجيم اعاني معاج ودايما كر وفر هههههاحاول قدر الامكان اني اخفف الدسم بطباخي وفي وصفات تصلح للرجيم اتمنى تحوز اعجابج :>زيارتج الاولى على عيني وراسي واتمنى انها ما تكون الاخيره :>