بهار الكايجن

هالبهار وايد حلو اخذته من مدونه طيخ مميزه  

https://imankhankhour.com

المقادير : 

  • 1 ½ م ك ثوم بودر 
  • 1 ½ م ك بصل بودر 
  • ¾ م ك = 2 ¼ م ص فلفل ابيض بودر  
  • ¾ م ك = 2 ¼ م ص فلفل اسود بودر  
  • 3 م ك بابريكا بودر 
  • ½ م ك فلفل احمر بودر ( اختياري ) 
  • ½ م ك بقدونس مجفف 
  • ¾ م ك = 2 ¼ م ص اوريغانو مجفف 
  • ¾ م ك = 2 ¼ م ص ريحان مجفف  
  • ¾ م ك = 2 ¼ م ص مرقدوش مجفف 

تبولة الربيان

سلطه لذيذه استوحيتها من تبوله اكلتها بمطعم لبناني تنفع كطبق رئيسي او بجانب الاكلات البحريه

وايد لذيذه

بسم الله نبتدي

المقادير : ( جميع المكونات حسب الرغبه )

  • 4 شدات / ضمات بقدونس كبيره مفرومه
  • 1 شده / ضمه اوراق نعناع مفرومه ( حسب الرغبه )
  • 1 كوب قمح مستنبت
  • 1/2 كوب كينوا مسلوقه
  • 1 خيار مقطع مكعبات صغيره
  • 2 طماط / بندوره مقطعه مكعبات صغيره
  • نصف بصله بيضاء مفرومه ناعم
  • حوالي كوب ربيان متبل ومشوي ( تتبيله فص ثوم مهروس وزيت زيتون وقفشه عصير ليمون وبهار ماجيك )
  • الصلصه:
  • ملح وفلفل اسود حسب الرغبه
  • ربع كوب عصير ليمون
  • ثلث كوب زيت زيتون

بابكا او خبز الجبن

الحين اشوف الكل يسوي بابكا

بابكا زعتر ، بابكا نوتيلا ، بابكا بيتزا، بابكا البيستو اشكال والوان شي مدور وشي بقالب التوست

فقلت لازم اجرب بشوف هالهبه على شنو …. ولاني ما اكلتها من قبل حاولت اقرا عشان اعرف خواصها ..من اللي قريته العجينه تكون بريوش او هالا وتنحشى بالحشوه المرغوبه

لفيت ولفيت واستقريت على هالوصفه …. العجينه حلوة ونكهه الزبده فيها واضحه وشكلها حلو عند التقطيع بس ما حسيتها بذوقي مع انها عجبت غيري فقلت انزل هالوصفه للي حاب يجرب هالنوعيه من الخبز

المقادير لقالبين خبز :

  • 3 اكواب طحين
  • 1 م ص ملح
  • 2 م ك سكر
  • 70 غ زبده مذوبه
  • 1 بيض بحراره الغرفه
  • 2 م ص خميره فورية
  • 1/2 كوب حليب دافيء
  • 1/3 كوب ماي دافي
  • 2 كوب جبن مبشور ( استخدمت تشيدر )
  • 1/2 م ص ثوم مجفف
  • 1/4 كوب بصل اخضر مقطع او 2 م ك اعشاب ايطاليه
  • للوجه : 1 م ك اعشاب ايطاليه + زبده مذوبه

الطريقة :

نفعل الخميرة بالماء الدافي مع السكر والحليب

نضيف كوب طحين ونخلطها ونتركها ثلث ساعه

نضيف باقي الطحين والملح والحليب والثوم المجفف والزبده ونعجن الحتى تتكون عجينه طريه

نترك العجينه تتخمر في وعاء مدهون حتى يتضاعف حجمها

نفرد العجينه لشكل مستطيل…. نوزع الجبن المبشور والبصل الاخضر او الاعشاب ونلفها على شكل رول

نقطع الرول بالنصف ونشكله على x ونجدل كل طرف بشكل تداخلي ( مثال توضيحي بالصوره )

ونضعه بوعاء الخبز المدهون ونتركه يتخمر التخمير الثاني ( حوالي نصف ساعه)

نمسح وجه العجبن بخليط الزبده مع الاعشاب ونخبزه حوالي 40-45 دقيقه

نمسح وجه مره اخرى بخليط الزبده بعد النضج ونتركه يبرد قبل التقطيع

خلطة الاعشاب الايطالية

هالخلطه رائعه جدا وسهله نزلتها بحسابي بانستقرام قبل اعلان وفاة الشيخ صباح الاحمد طيب الله ثراه

هالخلطه توصلت لها بعد عده وعده محاولات وتجارب … الكميه راهيه … الطعم عجيب .. وريحتها خنينه

ممكن تضيفون لها بابريكا اذافيه لتعزيز اللون او زياده اي نوع من انواع الاعشاب او الفلفل المجروش حشب ذوقكم

بالنسبه لي هذي افضل خلطه اعشاب ايطاليه توصلت لها …. انصحكم بفرك كل انواع الاعشاب باليد قبل الخلط لاستخراج الزيوت العطريه

المقادير :

  • 3 م ك اوريغانو مجفف
  • 2 م ك مرقدوش/مردكوش مجفف
  • 2 م ك ريحان مجفف
  • 1 م ك زعتر مجفف
  • 1 م ك بقدونس مجفف
  • 1 م ك روزماري/ اكليل الجبل مجفف
  • 1 م ص فلفل مجروش
  • 1 م ص ثوم بودر
  • 1 م ك جبن بارميزان مبروش معلب ( حسب الرغبه )

صمون البطاط بالاعشاب الايطالية

صمون طري وهش ولذيييذ جدا …. استخدمت فيه بودره البطاط المجفف وهي متوفره باغلب الجمعيات والسوبرماركت

لوصفه صمون البطاط العادي انصحكم بهالطريقه واذا تبون اللون اصفر ممكن تضيفون شوي كركم او صبغه

الوصفه اخذتها من احد المواقع بتعديلات بسيطه

https://www.crazyforcrust.com/fluffy-potato-rolls

بسم الله نبتدي

المقادير :  الكميه ل15 صمونه

  • 3 ½ كوب طحين ( استخدمت طحين مخلوط  2 ونص ابيض و 1 اسمر )
  • 1/3 كوب بطاط مجفف
  • 2 م ص خميره
  • 1 كوب مستبعد خمره ساوردو ( غير ضروري )
  • 1 م ك سكر
  • 3/4 كوب حليب سائل
  • 1/2 كوب ماء دافي
  • 3 م ك زبده
  • 1 م ص ملح
  • 1 بيضه بحراره الغرفه
  • 2 م ك اعشاب ايطاليه
  • للوجه : 20 غم زبده مذوبه + اعشاب ايطاليه

الطريقة :

نخلط 1 كوب طحين والملح والسكر وبودره البطاط المجفف والاعشاب والخميره والخمره الساوردو

نذوب الزبده مع الحليب والماء ونتركه يفتر ثم نضيفه للعجينه ونعجنه لمده دقيقه ونتركه 5 دقايق

نضيف البيض وباقي الطحين بالتدريج حتى تتشكل عجينه طريه ونتركها ترتاح تقريبا 15-30 دقيقه

نشكلها 15 كره ونضعها بصينيه الخبز مع ترك مسافه ونغطيها حتى تتخمر ويتضاعف حجمها

نمسحها بالزبده ونرشها بالاعشاب الاطاليه ونخبزها حراره متوسطه (170-180) لمده 20 دقيقه تقريبا

نمسح الوجه بباقي الزبده فور خروجها من الفرن وتغطى بفوطه لتحافظ على طراوتها

لذيذه جدا

غربيه الفستق

عيدكم مبارك وتقبل الله طاعتكم  

أتوقع الحين ترسنا بطونا من حلويات العيد اللذيذة من غريبه ودملوج وبيض القطا والكعك والمعمول بانواعه 

 عندي لكم اعتراف 

للحين ما طحت على وصفه معمول سميد معتمده .. عندي وصفات ناجحة لمعمول الطحين ومعمول السميد مع الطحين بس للأسف ماعندي وصفه سميد ساده مثل المعمول اللي كنا ناكله بلبنان مع اني اجرب بالسنه مرتين على الأقل وصفات جديده 

هالسنه جربت وصفه جديده وعلى الرغم انها خنينه بس ما طلعت مثل المستوى اللي اطمح له كانت قاسيه وفيها قرشه واضحه يمكن لانها ارتاحت بس ساعتين مع ان الوصفه كانت تطلب نشتغل فيها بعد نص ساعه بس.. مواصفات المعمول اللي ابحث عنه ابيها ماسكه بالايد وتفت باللسان وتكون معطره بماء الزهر والحشوه تكون ثلاث ارباع المعمول 

امي الله يرحمها كانت تسوي هالمعمول بهالطريقه وكلنا نشوف معمول امهاتنا الذ معمول 

مالنا بالطويله 

وصفات الغريبة متعددة ومتنوعة وكل بلد له سر يتميز فيه من الشرق للغرب 

بالمدونة وصفه للغربية … الغريبة الكويتية تمتاز باستخدام طحين النخي و/ او تحميص الطحين قبل خلطه مع باقي المقادير  

بشاركم الوصفة اللي اخذتها من حساب انتصار المطوع بإنستغرام 

بسم الله نبتدي  

المقادير : تعطينا كميه بسيطه وهذا المناسب بسبب الحظر الكلي بالعيد اذا تبون كميه اكبر ضاعفو المقادير

  • 1 ¼  كوب طحين محمص ( ابيض او اسمر مخصص للحلويات او اسمر عادي حسب الرغبه ) 
  • 1 كوب فستق مطحون  
  • ½ كوب سمنه بحراره الغرفه 
  • ½ كوب سكر بودر 
  • 1 م ك هيل / حبهان بودر 
  • رشه ملح 
  • فستق للزينه حسب الرغبه  

الطريقه: 

 نخلط الطحين المحمص والفستق والملح والهيل الناعم 

نخفق السكر مع الزبده ونضيف له خليط النواشف 

نكور العجينه ونزينها بالفستق حسب الرغبه ونضعها بصينيه الخبز ونتركها بالثلاجه نص ساعه تقريبا 

ندخلها فرن خفيف الحراره لمجرد ما تشقر القاع ونتركه يبرد ويقدم …نحتفظ فيه بعبوه مغلقه  

صحتين 

churros تشوروز

عجينه مقليه مقرمشه مغلفه بالسكر والدارسين / قرفه تتقدم عاده بالملاهي والمطاعم المكسيكيه ويقال ان الذ مكان يبيعها عالم ديزني بامريكا وباذن الله راح اشاركم بوصفتها ببوست منفصل

هالوصفه سهله مكوناتها بسيطه وبدون بيض …

بسم الله نبتدي

المقادير :

  • 1 1/3 كوب ماء
  • 2 م ك زيت نباتي
  • 1/2 م ص ملح
  • 1- 2 م ك سكر ( حسب الرغبه )
  • رشه فانيلا او دراسين
  • 1 كوب طحين
  • 1/2 م ص بيكنغ بودر
  • للتغليف : 1/2 كوب سكر مخلوط ب1 م ص دارسين/ قرفه ناعمه

الطريقه :

نغلي الماي والملح والزيت والسكر والفانيلا او الدارسين نضيف لهم الطحين والبيكنغ بودر ونسكر النار

نخلطهم لما تتكون كره ونتركها تبرد شوي ..نشكلها اصابع بكيس الحلواني ونقليها بزيت دافي لما تصير ذهبيه

نعفرهم بخليط السكر والدارسين… تقدم مع صلصه الكاكاو او التوفي حسب الرغبه

صحتين

بسبوسه الفستق بالقشطه

وصفه لذيذه اخذتها من بنات عمي

المقادير :
كوب ونص سميد
كوب سكر
كوب فستق مطحون
نص كوب جوزهند/ناريل
٢ م ص بيكنغ بودر
٢ م ك حليب بودر
١ علبه روب
قلاث ارباع كوب زيت
٢ بيض
١ م ص فانيلا او هيل
للقشطه:
كوب كريما
علبه قيمر
٢ م ك نشا
واي مطيبات تحبونها ( حطيت بمقدار الغطا ما زهر)
ولمسح الصينيه م ك هرده/طحينه
وللتزين اي نوع مكسرات مرغوبه وكميه الشيره حسب الرغبه
الطريقه :
ولا اسهل
نخلط مكونات القشطه على النار لما تثقل ونتركها ترتاح على ما نكمل الخطوات
نمسح صينيه بالهرده
نخلط السميد والفستق والناريل والبيض والشكر والروب والزيت والبيكنغ بودر
نصب نص الخليط بالصينيه
نوزع القشطه بدون ما نوصلها للاطراف قدر الامكان
نكمل باجي مقدار البسبوسه
نزينها بالمكسرات حسب الرغبه وندخلها فرن حراره ١٦٠ تقريبا ساعه الا ربع ونخلي عيونا عليها بمجرد ما تشقر الاطراف نشعل النار العلويه والسفليه لما تتحمر
نوزع عليها الشيره البارده اول ما نطلعها ونتركها تتشرب
نزينها حسب الرغبه
وعوافي عليهم الذ بسبوسه

خبز رمضان

سويت هالخبزة بالقرقيعان ووزعتها على الاهل والحبايب قبل بدء الحظر الكلي بالدولة

بعض الخبزات حاولت ارسم نجمه وهلال والباجي رشيت عليهم السمسم وحبه الحلوة والبركه عادي

الخبزة من الطحين الاسمر المحمص والشعير والطحين الابيض ومعجونه بالتمر والسمن/ الزبده والنتيجه حلوة

اخذت الوصفه من حسب يوسف مقيم بانستقرام وهو يقدم دورس مجانيه للساوردو بحسابه

بالوصفه اهو ذاكر طرقتين اما باستخدام خمره ساوردو او باستخدام الخميره الفوريه … انا خلطت الطريقتين مع بعض وعطتني خبزه منفوشه وهشه تقدرون تكتفون بنوع واحد بس لاني بديت بالخبزه متاخر وجدول الوقت ما يسمح لي اكمل خطوات الزمنيه للساودور

المقادير : ( بتعطيكم كميه كبيره من 8-10 خبزات حجم كبير )

  • 650 غ طحين ابيض
  • 400 غ طحين اسمر ( بالوصفه الاصليه 450 غ طحين اسمر وبدون طحين شعير )
  • 50غ طحين شعير
  • 150 غ ماء ( بالوصفه الاصليه 100 غ )
  • 400 غ حليب
  • معجون تمر مكون من 200 غ تمر +385 غ ماء
  • 200 غ خمره ساوردو/ خميره طبيعيه
  • 2 غ خميره فوريه
  • 20 غ زبده او سمنه بحراره الغرفه
  • 20 غ ملح
  • للوجه : بيض وحليب وممكن اضافه سمنه + خليط من السمسم وحبه البركه والحبه الحلوة

الطريقه :

نحمص الطحين الاسمر ونتركه يبرد

نخلط انواع الطحين مع الماء والحليب والخميره ومعجون التمر والملح ونتركها نص ساعه

نضيف السمنه او الزبده ونرد نعجنها مره ثانيه

نلف ونطوي اطراف العجينه الى المركز مرتين كل 45 دقيقه

نخلي لعجينه تتخمر تخميره بارد بالثلاجه / البراد لمده 12 ساعه تقريبا

نطلع العجينه من الثلاجه وتركها ترجع لحراره الغرفه

نشكلها لكور ونفردها حسب السمك المرغوب ونتركها 10 دقايق ترتاح

نمسح الوجه بخليط البيض والحليب ونرشها بالسمسم وحبه البركه والحبه الحلوة

نخبزها بالفرن بدرجه حراره 220-250 حتى تتحمر وتنضج

meatless Monday : بيتزا وكالزوني النوتيلا

وصفات البيتزا بالبلوق بتدش موسوعه غينس من عددها …. احب البيتزا بكل اشكالها واحب اجرب وصفات لها قد ما اقدر

اخذت هالوصفه من حساب بلييز بيتزا وطلعت وايد وايد وايد لذيذه … للاسف الوصفه نزلوها بيوم واحد وما ثبتوها ببوست بس لاني صورت الشاشه فاحتفظت فيه الحمدالله والتزمت بالمقادير والخطوات بالضبط بس دبلت المقادير جزء سويت فيه بيتزا وجزء سويت فيه كالزوني وحشيتها بالنوتيلا وكانت رائعه

بسم الله نبتدي

المقادير :


الطريقه :