كفته التونه بطريقه جيمي اوليفر

اهو مسميها ” tuna meatballs ” وطعمها حركه يديده وتغيير عن اللحم … طعمها يديد ومرح تحسون انها تونه … بالوصفه الاصليه اهو مستخدم  ستيك تونا وطبخه وبعدين خلطه بباجي المكونات… انا سهلت المهمه على روحي واستخدمت التونا المعلبه .. الصلصه وايد سهله وخفيفه ولذيذه… انا اكلت معاها باستا سمره وكانت وجبه مشبعه وبنفس الوقت مو ثقيله على المعده .. ممكن تحشونه بسندويشات بدال الباستا

اخذت الوصفه الاصليه من موقعه

شكلها يشوق مو  ؟ 🙂 … لينك الوصفه :

http://www.jamieoliver.com/recipes/fish-recipes/the-best-tuna-meatballs-le-migliori-polp

المقادير الكفته : ( انا استخدمت نص المقدار المذكور  )

علبتين تونا

تقريبا ثلث  كوب صنوبر محمص

قفشه صغيره اوريغانو مجفف

تقريبا ربع كوب بقدونس مفروم

كوب بقسماط

نص كوب جبن بارميزان مبشور طازج وكميه اضافيه للويه

بيضتين

ربع قفشه صغيره دارسين ناعم ( وممكن تقللونه اذا ما تحبون نكهته بس بالوصفه الاصليه حاط قفشه صغيره وحسيتها وايد )

ملح وفلفل اسود

بشر ليمونه وعصيرها

الصلصه :

زيت زيتون

بصله صغيره مفرومه

4 فصوص ثوم ناعم

قفشه صغيره اوريغانو مجفف

علبتين طماط مع عصيرها

ملح وفلفل اسود

وشوي بقدونس مفروم

الطريقه :

نسوي الصلصه بالاول … نحمي زيت الزيتون ونضيف له البصل والثوم ونقلبهم لين يتغير لونهم وبعدين نضيف الاوريغانو والملح والفلفل الاسود والطماط ونخليها على النار لين تثخن وبعدين ننعم الخليط كله بالخلاط ونرده على النار

نخلط مقادير الكفته كلها عدل  ( تونه والصنوبر والبقسماط والبيض والاريغانو والملح والفلفل الاسود والبقدونس والجبن وقشر الليمون وعصيره )  ونشكله على هيئه كرات ونبرده بالثلاجه شوي  اما نحمره بشوي زيت زيتون او ندخله الفرن لين يتحمر

بعد ما تتحمر نردهم للصلصه  مع اضافه شوي زيت زيتون – استغنيت عن هالاضافه – ونخليهم شوي وبعدين نقدمهم

نقدمه مع رشه من البقدونس وجبن بارميزان او صنوبر مثل ما تحبون وممكون ترشونه  بفلفل احمر مجفف وبالف عافيه