Ina’s steak marinate تتبيله الستيك بطريقه اينا غارتن

بعد ما طلبوها شاي الضحى ولينا بنزل هالوصفه وان شاء الله اليوم العصر انزل وصفه الكب كيك لانجل هارت :>
 مثل ما قلت لكم هالوصفه اخذتها من بيرفوت كونتيسا وصج لذيذه انصحكم تستخدمونها حق الستيكات او الدياي و بتلاحظون ان التتبيله تشبه دريسنغ سلطه الحلو فيها انكم تقدرون تتحكمون وتغيرون مكوناتها حسب مزاجكم خاصه بالاعشاب وتقدرون تلغونها وتكتفون بباجي المقادير .. بالوصفه الاصليه تستخدم 3/4 كوب عصير ليمون مع 1/2 كوب زيت … بهالمقدار تحسون بالحموضه مركزه فقللت المقدار لي كميه متساويه من الاثنين واذا ما تحبونها حامضه خلوها ربع كوب على نص كوب زيت :>… ترا الكميه الكبيره اخذو منها ما يناسبكم
المقادير:
نص كوب زيت زيتون
نص كوب عصير ليمون
قشر ليمونه مبروشه
6 فصوص ثوم مهروسه
1و 1/2 قفشه كبيره روزماري او اكليل الجبل واذا ما تحبونه تقدرون تبدلونه باي شي ثاني
1 قفشه كبيره زعتر اخضر عريض thyme
2قفشه صغيره مسترد ( سواء ديجون  او المسترد الاصفر العادي او المسترد اللي معاه حبيبات )
قفشتين صغار ملح
قفشه صغيره فلفل اسود واذا تحبون اكثر ضيفوه
رشه مطري لحم ( مو ضروري )
الطريقه:
تخلطون كل المقادير بالخلاط وتنقعون فيه اللحم او الدياي لفتره عشان يتبل وكل ما طالت المده النتيجه بتكون افضل
بالنسبه للشوي اكو طريقتين وراعو قبل لا تشونه فتره الشوي لازم تتناسب مع سمك الستيك
يا تتخلصون من التتبيله وتشون الستيك عادي
او انكم تحمرونه شوي بالمقله مع نتفه زبده او زيت زيتون وبعدين تضيفونه بالفرن مع التتبيله مالته ( انا اسخنها قبل لا اضيفها عشان لا تكون التتبيله بارده واللحم ساخن ) لين يستوي
وبعدين قدموه مع خضار وبطاط مشوي وبالف عافيه

7 thoughts on “Ina’s steak marinate تتبيله الستيك بطريقه اينا غارتن

  1. يقول شاي الضحى:

    مشكووووووووره حبيبتي على الوصفه :***وتسلم ايدج وعليج بالعافيه وان شاءالله بنجربها🙂

  2. يقول الوتيــــــــــن:

    يمي يميتسلم اييييييييدج حبيبتيانزين شنو مطري اللحم؟ ولو بغيت اللحم عليه صلصة ؟؟ عادي احط عليه باربكيو سوس؟ او صلصة اللحم روزوشستر سوس مادري شسمها !!!

  3. يقول bent el deera:

    شاي الضحى *********شايونه حبيبتي مشكوووره والله يسلمج من كل شر :>ان شاء الله تجربينها وتكون على ذوقج :>امس رحت لولو ماركت وذكرتج ههه

  4. يقول bent el deera:

    الوتيــــــــــن *****************الله يسلمج حبيبتي مشكووره :>مطري اللحم تحصلينه صوب البهارات شكله مثل الملح :> واذا مو موجود مو ضروري لاني ما استخدمه الا نادرواذا حبيتي صلصه تقدرين تحطين اي نوع عليه بعد الشوي او بالتتبيل :>او تقدرين تاخذين خلطه التتبيله وتحطينها على النار مع مكعب ماجي وشوي طحين وماي وتطلع لج صلصه مثل الجريفي :>

  5. يقول Amal Kh:

    مشكوووره ع الوصفه ان شاء الله عن قريب بجربها وشكلها حيل حلو عليج بالعافيه

  6. يقول yasmeen:

    التتبيلة وايد كانت حلوة ما شالله بس اللحم طلع يابس شوي حسافة، كانت غلطتي لأني كنت مترددة بالجمعية بين الفيليه السميك أو قطع سرليون، إلي أعرفه أن السرليون ألين بس تسلطت و شريت الثاني، يالله ما عليه درس و تعلمته، اليوم دور بيتزا أينا🙂
    يا حلات هالبلوق بس، الله يعطيج العافية🙂

    • يقول bent el deera:

      حسافه ما عليه بالمرات اليايه تضبط ان شاء الله :>

      وحياج الله عندي دوووم :>

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s