كباب كوبيده

 ايميل من اخوي كاظم من البحرين يطلب فيه وصفه كباب كوبيده… الصراحه  ما عمري سويت كباب ايراني بالبيت دايما اشتريه من بره بس قلت يالله خل ادور جم وصفه واسويه بالبيت… وطلع طعمه بالضبط نفس مال المطاعم ولو مشوي بالفحم اتوقع بيطلع احلى
اغلب الوصفات بالانترنت تتفق ان كباب كوبيده عباره عن لحم وبصل وكركم وملح وفلفل اسود .. بعض الوصفات تستخدم بيض وبعضها يستخدم شوي بقدونس وبعضها يستخدم فستق وبعضها يستخدم زعفران

انا سويتها بالضبط نفس هالوصفه اللي اخذتها من اللينك… جربوها وايد سهله 

http://turmericsaffron.blogspot.com/2009/04/pan-kabab-kabab-deegi.html

الافضل بتشكيل الكباب ان يكون عندكم شيش حديد عريض نفس هالصوره

انا ماكان متوفر عندي فاستخدمت الاعواد الخشبيه العاديه من النوع المتين عشان تتحمل اللحم… تقدرون وانتو تشوون اللحم تضيفون زبده على الويه عشان النكهه وزياده الدسم .. انا استغنيت عنها 


جروبها وان شاء الله تكون على ذوقكم

المقادير راهيه … قسموها على هواكم :


كيلو لحم مفروم مدهن  ( انا استخدمت ثلثين غنم وثلث بقر )
بصله كبيره مبشوره ( بشروها و تخلصو من ماي البصل اللي معاها )
قفشه متوسطه كركم
نص قفشه صغيره زعفران
ملح وفلفل اسود حسب الرغبه
سماق 
طماط وبصل وفلفل اخضر للشوي معاه

 

الطريقة:

نخلط اللحم المفروم مع البصل المبشور والزعفران والكركم والملح ونعجنها عدل… انا رديت فرمت اللحم مره ثانيه و خلطته معاهم )

تحطونه بالثلاجه جم ساعه عشان يمسك  وما ياذيكم بالتشكيل واذا ما مسك ضيفو له بيضه عشان تمسك وردوه الثلاجه مره ثانيه

نسخن الشوايه ونمسحها بشوي زيت ونضيف البصل لانه يطول بالشوي… نشك اللحم بالشياخ ونشويه لحد ما يستوي .. طبعا بهالفتره نضيف الطماط معاه

 

وهو حار رشوه بالسماق واكلوه بالف الف عافيه

 

انا اكلته مع بطاط مشوي وسلطه جرجير 

الإعلان