متبل الشمندر او شمندر بطحينه

احبه جدا ووايد لذيذ … اذا بذكر مقايري التقريبيه وعدلو اللبنه والليمون على هواكم … الروب اللي استخدمه روب بيت ثقيل بدلوه بلبنه اذا ما عندكم

المقادير والطريقة :

شمندر بطحينه او متبل الشمندر …لذيذ ويستحق التجربه عباره عن علبتين كبار شمندر حجم 400 غ + نص كوب هرده +ربع عصير ليمون + 2 م ك روب بيت او لبنه + ملح. والكل بالخلاط … ممكن تضيفون لها جوز مفروم او فص ثوم مهروس ويترك جم ساعه بالثلاجه يتماسك نزينه بالرمان وزيت الزيتون بالويه

Posted by bent el deera in فطور- ريوق - سفرات كاملة, شوربة واطباق جانبية الوسوم:مقبلات, متبل الشمندر, بنجر, شمندر, شمندر بطحينه

6تعليقات

homemade almond butter …زبده اللوز

وايد سهل وارخص من اللي نشتريه من الجمعيات وصحي اكثر لان ما فيه مواد حافظه … المكونات الاساسيه عباره عن لوز  ورشه ملح فقط … هالخطوات تقدرون تسوونها بالفول السوداني ( سبال ) او بالبندق او الكازو (كاجو ) او فستق او خليط من كذا نوع … اضافتي لها ملعقه كبيره من بذور الكتان وهذا حسب الرغبه

المقادير والطريقه :

نحمص  كوبين لوز بالفرن على درجه حراره 200 لمده 7 دقايق لما يتحمص  وتطلع ريحته

نتركه يدفي شوي وبعدين بالخلاط مع ملعقه كبيره حبوب الكتان ورشه ملح ورشه فلفل احمر بودر ونطحنه لما يوصل لقوام المرغوب ( هالعمليه تاخذ 10 دقايق تقريبا )

وبالعافيه

Posted by bent el deera in فطور- ريوق - سفرات كاملة, مونه, اطباق خفيفه, شوربة واطباق جانبية الوسوم:زبده اللوز, طحينه اللوز

تعليق واحد

شوفان مربى الفراوله وزبده اللوز

اخيرا لقيت وصفه شوفان تعجبني للريوق .. هالوصفه تحاكي الساندويش المشهور بزبده الفول السوداني والمربى … حاولت اسويها صحيه اكثر و استبدلت الفول السوداني باللوز .. بس هالوجبه ثقيله وانصح فيها بالايام البارده فقط او اذا الوجبه اللي بعدها بتكون متاخره وما تبون تحسون باليوع .. طريقه مربى الفراوله موجوده باللينك … زبده اللوز بنزلها بموضوع منفصل ..وطبعا تقدرون تستخدمون المعلب الجاهز من الجمعيه او البقاله

الكميه اللي بذكرها  حق شخص واحد

المقادير والطريقه :

نص كوب شوفان كامل يطبخ على النار مع كوب حليب اللوز ( او  حليب عادي ) ونصف ملعقه صغيره اغافا نكتار ( او عسل او سكر )  لمده 5-7 دقايق حسب الكثافه المرغوبه

يوضع بطبق التقديم وفوقه ملعقه كبيره من مربى الفراوله و ملعقه صغيره من زبده اللوز وبالف عافيه

Posted by bent el deera in فطور- ريوق - سفرات كاملة, وصفات صحيه قليله السعرات او الدهون وتصلح للرجيم, اطباق خفيفه الوسوم:شوفان

رد

خبز التمر او تبدون

خبز كويتي شتوي فريد وطعمه لذيذ .. حلاته بالعصريه يم دوّه الفحم ومعاه جبن قلاص او ممكن جبن ابيض مالح (مره ذقته بالدوام محشي جبن ابيض مثل الفطاير وكان حلو ) اساس هالخبز التمر بس اذا ما تحبونه او مو متوفر عندكم طبقو نفس الخطوات بس زيدو كميه الشكر

عمتي الله يشافيها تسوي احلى خبز تمر ممكن تاكلونه وكانت عندها عاده بهالوقت تطرش لنا منه …  ولانها بره الديره الله يردها لنا بالسلامه قررت اسويه بالبيت …جربت بوصفه منال العالم بس زدتها شكر ودبس عشان اللون والنكهه وهم زدتها حليب عشان الطراوه  وحبه حلوه وينسون بودر وحسيت ان الخبز ناشف شوي فزدته زيت بالمره الثانيه  .. الطحين المستخدم مخلوط ( كامل وعادي اسمر وابيض )وكميه الماي ومده النخمير تختلف بالفصول وحسب المطابخ فزيدو وقللو حسب الحاجه

المقادير : ( تعطيكم 20 حبه صغار او 12 كبار )

كوب تمر من غير نوى

كوب ونص ماي مغلي

3 كوب طحين

1 م ك خميره فوريه

1 م ص ملح

3 م ك شكر ( اسمر او ابيض  او ستيفيا )

م ك دبس التمر او السكر

2 م ك حليب بودر

نص م ك ينسون ناعم

نص م ك حبه حلوه ناعمه ( شومر )

م ك حبه بركه

خليط سمسم وحبه بركه وحبه حلوه للويه

2 م ك زيت  ( حسب الرغبه )

الطريقه :

تتقع التمر بكوب من الماي المغلي  ليما يذوب ونهرسه بالخلاط وبعدين نضيف كميه باجي الماي ( الهدف منه انه نحافظ على الماي دافي لتفعيل الخميره لان اذا حطينا كل الماي مره وحده بيبرد على ما يذوب التمر )

نخلط كوبين ونص طحين مع الينسون وحبه الحلوه وحبه البركه  والخميره  والحليب والشكر والدبس والملح وحبه البركه وخليط الماي والتمر ونضيف باجي الطحين بالتدريج لين يتكون لنا عجينه متماسكه .. نتركها تخمر لما يتضاعف حجمها بطاسه مدهونه بالزيت

نقطعها ونكورها ونتركها ترتاح مره ثانيه

نمسح الصينيه بالزيت وندخلها الفرن تسخن

نفرد كور العجين اليد ونرشها بخليط الحبوب ونحطها بصينيه الفرن الساخنه ونتركها اول ما تتحمر نشيلها ونكرر الخطوات

ممكن تحطون بالويه دبس تمر وبعدين الحبوب

وممكن بعد ما تطلعونها تمسحونها بشوي زيت على الويه

وبالعافيه

Posted by bent el deera in وصفات منال العالم, اطباق نفاس, اطباق شعبيه, خبز, ساندويشات ومعجنات الوسوم:تبدون, خبز تمر

2تعليقات

دياي بالبقسماط بالفرن

استخدمت جهازي المفضل قيلبس ايرفراير لخبز الدياي .. هالوصفه حلوه للي يبي يحافظ على وزنه  وبنفس الوقت مشبعه … مرج اجذب عليكم الدياي طلع شوي ناشف يمكن لو قدمتوه مع صلصه او بطاط مهروس افضل من انه يكون بروحه مع البروكلي

المقادير حق 2 فيليه دياي

المقادير :

نص كوب لبن

 م ص بابريكا

نص م ص كمون او بهار دجاج

نص م ص اوريغانو

نص م ص اعشاب ايطاليه مخلوطه

نص م ص ثوم بودر

م ك خردل ديجون

ملح وفلفل اسود حسب الرغبه

بقسماط للتغطيه ( بانكو )

نص م ص زيت زيتون

الطريقه :

نخلط اللبن مع نص كميه البهارات المذكوره و ملعقه الخردل  ونتبل فيه الدياي ويفضل يوم كامل

نخلط باقي البهارات مع البقسماط وزيت الزيتون

نشيل الدياي من خليط اللبن ونلته بالبقسماط ونحطه بصينيه الفرن الساخنه او بالجهاز

اول ما يستوي الدياي ويتحمر نشيله ونقدمه وبالف عافيه

Posted by bent el deera in وصفات صحيه قليله السعرات او الدهون وتصلح للرجيم, اطباق رئيسية الوسوم:وصفات صحيه, دجاج, دجاج بالبقسماط غير مقلي, دجاج صحي

رد

حمسه فقع

اكله كويتيه معتبره خاصه بايام البرد …يبيلها بس دوّة وفحم وشاي او قلاص لبن بالزبد … اذا كان الفقع ( كمأ) فرش فيفضل انه يسلق بعد التنظيف واذا كان معلب ينحط بالحمسه على طول … حلاتها بالزبده او السمنه ولا تكثرون بهاراتها عشان لا تطغي على طعم الفقع اللذيذ

المقادير والطريقه :

نحمس بصل وفلفل حار ( علوب ) بزبده ونضيف لهم الفقع ( كمأ) المقطع مع شوي كركم وفلفل اسود وبهار وممكن شوي من ماي سلق الفقع ونخليه على النار لما يستوي … ينوكل مع خبز تنور مسمسم وبالعافيه

Posted by bent el deera in اطباق شعبيه, شوربة واطباق جانبية الوسوم:فقع, كما

رد

philips airfryer … my new best friend

اخذته قبل فتره وحبييييته جدا جدا .. اهو عباره عن فرن صغير نقدر نسوي كل الاطباق اللي نسويها بالفرن عاده بالاضافه الى تحمير بعض الاصناف اللي تنوكل عاده بالقلي مثل البطاط او النجتس او الهوت دوغ وغيرها

الجهاز حجمه صغير ..  يعني يسع حق كميه اكل تكفي حق شخصين ومع الجهاز عازل لخبز صنيفين بنفس الوقت … ينباع صينيه خاصه تدخل بالفرن للاشياء السائله اوخليط الرطب ( لان بقاعده الجهاز شبك فما ينفع لكل الاصناف )

اول الاصناف اللي جربتها فيها كانت البطاط ( طبعا !!).. وكانت النتيجه جدا حلوه لان الفرن ساخن فاستوت البطاط بوقت اسرع من الفرن العادي بالاضافه الى انه كسب قرمشه حلوه … مرح ابالغ واقول انه احلى من البطاطا المقليه لكنه شي لذيذ وبديل بنفس الوقت

البطاط تبلته بملح واريغانو وثوم بودر وبابريكا واقل من نص قفشه صغيرة زيت زيتون … الربيان ملح وفلفل اسود وبهارات سمج وهم شوي زيت زيتون

النتيجه جدا مبهره وانصح كلي اللي يحب الاكل الصحي او انه يطبخ لشخص واحد او شخصين ياخذه

Posted by bent el deera in وصفات صحيه قليله السعرات او الدهون وتصلح للرجيم, اطباق خفيفه, اطباق رئيسية, سلطات ومقبلات الوسوم:بطاط صحي, ربيان

رد