i love to cook .. love to eat .. and this is my kitchen

مطعم هندي بجمعيه القادسيه

سمبوسه القادسية

برايي احلى سمبوسه ومقالي هنديه … الحشوه متروسه والعجينه مو يابسه … ما شاء الله دايما عليه زحمه وهذا يطمن ا نالاكل اللي بتاكلونه ساخن مو بايت لانه يخلص اول باول … وحتى لو ما عجبكم تبون شي توه مقلي تقدرون تطلبون منه هالشي

يبيع بعد سمبوسه محشيه ومبرده حق خاصه للناس اللي تهتم باوزانهم وتبي السمبوسه مشويه بالفرن تقدرون تشترون منهم وتشوونها بالبيت

سمبوسه القادسيه 2

اكثر شي احبه عندهم سمبوسه الجبن والبيتزا والباكورا وساعات اودي حشوتي او اطلب حشوتي الخاصه وهو يلفها وامر اخذها بنفس اليوم … ما جربت ساندويشاتهم بس اشوف ناس تطلب منهم … هالموضوع المفروض انزله قبل سنتين برمضان بس توني اكتشف اني نسيته

رقمهم : 22574812

سبانخ بالزيت

سبانخ بالزيت

اخذت فكره الوصفه  من الشيف محمد اورفلي من قناه فتافيت.. لغيت الثوم والبصل المقلي لانها كانت للريوق ( فطور ) وخليتها تبرد بالثلاجه جم ساعه ( وممكن قبل ليله ) وطلعت طيبه وحامضه وماشيه مع الرمان .. قدمت معاها خلطه الجبن بالزعتر الاخضر ( جبن نابلسي او حلوم مع زعتر وزيت وسماق وزعتر اخضر وطماط جبلي وشرايح زيتون ) و حمسه السبانخ وتحصلونها على هاللينك

سبانخ بالزيت 2

المقادير :

كيس سبانخ مثلج او ما يعادله طازج

بصله صغيره مفرومه حسب الرغبه

1/4 كوب عصير ليمون ( ممكن اقل او اكثر حسب رغبتكم بالحموضه )

1/4 كوب زيت زيتون + كميه اضافيه للوجه حسب الرغبه

2 م ك كزبره مفرومه

1 م ك سماق

ملح وفلفل اسود حسب الرغبه

1/4 م ص فلفل مجروش ( شطه )

اضافات اخرى

2 فص ثوم مقطع شرايح ومقلي بالزيت يخلط مع السبانخ والبصل

شرايح بصل مقلي للوجه

دبس رمان للوجه حسب الرغبه

جوز مفروم للوجه او صنوبر محمص

زرشك مقلي

الطريقه :

نسخن زيت الزيتون ونضيف له البصل و الفلفل المجروش ونحركه لما يذبل البصل نضيف له الكزبره ونحركها واذا ذبلت نضيف لها السبانخ والملح والسماق والفلفل الاسودونتركها على النار لما تتجانس ونضيف لها عصير الليمون ونسكر على النار ونتركها تبرد قبل التقديم

عند التقديم يضاف لها حبوب الرمان وزيت الزيتون وبالف عافيه

ربيان مشوي بصلصه الجبن

ربيان بصلصه الجبنهالوصفه سريعه ولذيذه .. الربيان ( القريدس ) بالموسم الحين انصحكم تستخدمون الربيان الطازج للوصفه لان المثلج ما ينفع معاها… البهارات ( التوابل ) المستخدمه ماركه ماجيك النوع المخصص للسالمون ممكن تستبدلون البهار باي نوع ترغبونه او تكتفون بالملح والفلفل الاسود

جربوها وان شاء الله بتعجبكم.. المقادير حسب الرغبه

المقادير :

ربيان طازج مفتوح من جهه البطن ويفتح ويفرد مع الاحتفاظ بالقشر

1 م ص من كل من ( بهارات سمك ، ملح ساليري “كرفس الانجليزي “)

1/2 م ص فلفل اسود

1 م ك عصير ليمون + قشر نصف ليمونه

2 م ك زيت زيتون للشوي

مقادير صلصه الجبن :

قالب جبن تشيدر مبروش

1/2 كوب حليب مجفف ( بودر)

1 كوب ماء او اكثر حسب السماكه المرغوبه

1/2 مكعب ماجي خفيف الملح ( مو ضروري )

رشه بابريكا

الطريقة :

يتبل الربيان ببهار السلمون وملح الساليري وفلفل اسود مع عصير ليمون والقشر و زيت وخليته .. شويته عادي

الصلصه( نخلط جميع المكونات على النار حتى تثخن ) .. نصب على الربيان جزء وننثر فوقه بقدونس مفروم والباجي نخليه للتغميس

سلطه الخضار بدريسنغ الجبن

سلطه بتتبيله الجبن

الدريسنغ خذته من كتاب منال العالم… تشبه طعم السلطه اليونانيه بشكل كبير واتوقع اضافه الزيتون بتعطيه طعم احلى… المقادير كلها حسب الرغبه

المقادير:
طماط مكعبات كبيره
خس شرايح
خيار مقطع انصاف دوائر
اوراق بقدونس
بصل اخضر شرايح رفيعه
فلفل اخضر مكعبات

مقادير الدريسنغ:
نص كوب جبن ابيض فرنسي مفتت بالشوكه
ربع كوب خل
3 م ك عصير ليمون
نص كوب زيت زيتون
نص م ص ثوم
م ك ريحان مجفف
نص م ك اوريغانو
م ص ملح

الطريقة:
نخلط مقادير الدريسنغ ( الخل والزيت والثوم والملح والاعشاب العطريه وعصير الليمون حتى يكون محلول مستحلب وبعدين نضيف الجبن ونخلطه ونتركه لي قبل التقديم
نخلط مكونات السلطه ونضيف الدريسنغ فوقها وتقدم على طول

ميد مشوي سهل

ميد مشوي سريع

بتحصلون 3 وصفات حق الميد على هاللينك … هالوصفه سريعه وممكن تجهيزها بالتتبيل قبل بيوم عشان تتشرب النكهات ممكن تنظفونها باي طريقه تحبون وممكن تنشوي كامله من غير تنظيف حسب الرغبه… عند تسخين الصاجه ممكن ترش بالرده ( نخاله ) قبل الشوي او تشوى على طول وكلها حسب الرغبه

المقادير حسب الرغبه :

ثوم مهروس تقريبا نص راس

2 م ص بهار سمك ( مجدي او اي نوع )

1 م ص ليمون اسود بودر او2 م ك  عصير ليمون او ليمون اخضر

صبار او صلصه HP حسب الرغبه

وملح

الطريقه :

نخلط كل المقادير ونتبل قيها بطن وظهر السمك ونتركه يتشرب من البهارات وممكن يترك يوم كامل بالثلاجه  ونشويه بالصاجه ويؤكل حالا و بالف عافيه

صينيه كور البطاط باللحم بطريقه منال العالم

صينيه كور البطاط

اخذتها من موقعها باسم صينيه البطاطس بالشاورما … ممكن استخدام الشاورما الجاهزه لتسهيل العنليه او تبديل اللحم بشرائح دجاج فيليه او دجاج مفروم  وممكن اضافه خضار للخليط لقيمه غذائيه اكبر …سهله وسريعه و ممكن تتجهز قبل بيوم للتسهيل للامهات العاملات

استبدلت جبن البارميزان بجبن تشيدر وممكن اضافه جبن غودا مدخنه لنكهه اعمق وبدلت السمن بالزيت وقللت مقداره … الخطوات بالتفصيل موجوده بموقعها باليوتيوب وموقعها على هاللينك

صينيه كور البطاطس

المقادير :

خلطه الشاورما :

1/2 كيلو لحم ستروغونوف او شاورما  ( بفتيك مقطع شرائح )

1 م ك ثوم مهروس

1 م ك زيت زيتون او زيت ذره

1 بصل مقطع شرائح طوليه

2 م ص بهار شاورما او بهار عادي

1/4 م ص فلفل اسود

1 م ص ملح

خليط كور البطاطا :

3-4 حبات مقشره ومسلوقه ومهروسه

1/4 كوب جبن تشيدر مبشور ( او ممكن بارميزان او رومي او خليط اجبان حسب الرغبه )

1/2 كوب بقدونس مفروم

1/2 كوب حليب ساخن

2 م ك زبده مذوبه

فلفل حار حسب الرغبه ( اختياري )

1 م ص كزبره بودر

1 م ص ثوم بودر

1/4 م ص فلفل اسود

2 م ص ملح

البشاميل ( الصلصه البيضه ) :

6 م ك زيت ذره او زبده

6 م ك طحين ( دقيق )

3 كوب حليب سائل

1 كوب جبن موتزريلا مبشور او ممكن اضافه جبن مدخن

ملح حسب الرغبه

بابريكا للوجه

الطريقه :

نحمر البصل بالزيت حتى يطرى ثم نضيف الثوم و اللحم والبهارات نص سواء ونضعه بصينيه الفرن

نخلط البطاط المهروسه مع الزبده والحليب الساخن والبهارات والجبن واخيرا البقدونس ونكورها دوائر صغيره ونضعها في صينيه الفرن فوق اللحم

نسخن الزيت ونقلب الطحين حتى يتغلف بالزيت ونضيف الحليب البتدريج حتى تتكون صلصه متماسكه ومتجانسه ونضيف اليها نص مقدار الجبن والفلفل والملح  ونصبه بصينيه الفرن فوق كور البطاط ونرش باقي الجبن والبابريكا على الوجه ويدخل فرن حوالي نص ساعه حتى يتحمر البشاميل وبالف عافيه

review : محل دانه البحرين للمنتجات البحرينيه

محل دانه البحرين

يا حلو البحرين وحلو شعبها واهلها … المنتجات البحرينيه وخاصه الحلوى والمتاي مطلوبه بكثره لطعمها المميز … بهاراتهم بعد عجيبه ولا استغنى عنها … لقيت محل يبيع كل هالمنتجات وفناتقهم الحلوة وما يحتاج نوصي عليهم من البحرين

السبب الرئيسي اللي خلاني اروح له هالبهار ( بهار الدقوس )بهار الدقوس

من شفت سليمان القصار يسوي الكباب البحريني وقال هالبهار لازم يكون موجود .. الوصفه تلقونها على هاللينك

رحت العقيله مجمع النوخذه قبال البيرق ادور على محل دانه البحرين ( تلقونه بره ما يحتاج تدشون المجمع ) …المحل بصراحه صغير بس فيه كل شي ما شاء الله

20130829_122117

صينيه البهارات البحرينيه الخنينه … الحجم الصغير اذا ماني غلطانه سعرها 3.500

20130829_110045

فناتق اهل البحرين مرشات ماي ورد وماي لقاح وزموته والزعتر وغيره  .. عجبوني ملوت ماي الورد وقمت ارشش على ويهي بالحر يبرد وهم يعطي نضاره :) … وطبعا عندهم الغراش الصغيره حق الشاي والماي وغيره

20130829_105847

شوفو شحلاتهم اعتقد سعرهم 2.000… اللي تحته درابيل بحريني( نشاب ) ما سالت عن سعره … وهذا ماي الورد اللي اخذته

مرش ماي ورد صغير

20130829_105826

هالشي الكيوت عباره عن اجار (طرشي) خضار صغير مغلف فردي حجمه نتفه يهبل … اعتقد هم سعره 2.000 او2.500

اجار صغير ميني

شوفو شحلاته كيوووت

20130829_105330

اللي يم البطاط خلطات جاهزه لبعض انواع العجاين مثل الكباب البحريني والبيتزا واللقيمات وغيرها اسعارهم 2.000 واللي يمهم ماي مخلوط بماي لقاح وتمر وللاسف نسيت اسعارهم

20130829_105318

وطبعا الحلوى الشهيره والسمبوسه البحرينيه اللذيذه بالنوعين المشويه والمقليه ومتاي احجام بالفلفل وغيره وسعره 1.000 و 2.00020130829_105308

وكل انواع الاجارات ( الطرشي ) البحريني والمعابيج  واسعارهم تتفاوت بين 1.500-2.500 وانواع المعمول وخلطات القهوه

العنوان بالتفصيل وارقامهم تحصلونه بالصوره .. والحلو ان عندهم توصيل بعد

دانه البحرين عنوان


Follow

Get every new post delivered to your Inbox.

Join 888 other followers